Shekara mańyndaǵy jurtshylyq turmystyń taýqymetin tartyp otyr - Senat depýtaty S. Eńsegenov
ASTANA. 4 qazan. QazAqparat - Shekara mańyndaǵy jurtshylyq turmystyń taýqymetin tartyp otyr.
Búgin QR Parlamenti Senatynyń jalpy otyrysynda Úkimet basshysynyń atyna saýal joldaǵan senator Sársenbaı Eńsegenov osylaı málim etti.
Senatordyń aıtýynsha, Atyraý oblysy Qurmanǵazy aýdanynyń Azǵyr óńirindegi úsh selolyq okrýgke kiretin 9 eldi mekende 8 myńǵa jýyq adam turady. Aımaq aýdan ortalyǵynan 300, al oblys ortalyǵynan 600-ge jýyq shaqyrym qashyqtyqta ornalasqan. Aýdan ortalyǵymen eki ortada avtokólik ne temir jol qatynasy joq. Jyldyń kóktem, kúz jáne qys aılarynda qatynas qıyndap, keı ýaqyttarda ol aýa raıynyń jaısyzdyǵynan toqtatylady.
«Azǵyr óńiri úshin eń jaqyn ornalasqan Reseı Federatsııasynyń Astrahan oblysynyń eldi mekenderi. Erteden eki shekaralyq aımaq arasynda tyǵyz qarym-qatynas ornaǵan. Biraq, búgingi kúnge shekaradan ótýde qalyptasyp otyrǵan jaǵdaı Azǵyr óńiriniń turǵyndary úshin úlken qıyndyqtar týǵyzyp otyr», - deıdi S. Eńsegenov. Onyń aıtýynsha, eki memleket arasyndaǵy shekarany kesip ótý Qazaqstan men Reseı Úkimeti arasyndaǵy shekara mańyndaǵy aýmaqtar turǵyndarynyń memlekettik shekarany kesip ótý tártibi týraly 2007 jylǵy 21 shildede qabyldanǵan kelisimmen retteledi.
«Kelisimge sáıkes Azǵyr óńirinde eki: Balqudyq-Qarabaly jáne Jalǵyzapan-Basqunshaq aýmaǵynda shekarany kesip ótý orny belgilengen. Bular yqshamdalǵan ótkizý pýnktteri bolyp esepteledi. Osyǵan baılanysty, turǵyndar Reseı Federatsııasynyń kórshi aýdanyna tek úsh táýlikke deıingi merzimge bara alady jáne ár adamǵa 35 keliden artyq júk alyp ótýge ruqsat etilmeıdi. Olar Reseıdiń basqa eldi mekenderine bara almaıdy. Bul Azǵyr óńiriniń turǵyndary úshin turmystyq qıynshylyqtar týǵyzýda. Olardyń mal ónimderin Reseıdiń kórshiles óńirlerine shyǵaryp satýyna múmkindikteri joq. Sol sııaqty, turǵyndardy kúndelikti turmystyq zattarmen qamtamasyz etip júrgen jeke kásipkerler jumysy da shekteýli», - deıdi senator. Onyń sózine qaraǵanda, óńir turǵyndaryna mal ónimderin, al kásipkerlerge 300 shaqyrym qashyqtyqtaǵy aýdan ortalyǵynan jolsyz jermen taýarlaryn tasymaldaý tıimsiz. Bul aınalyp kelgende, aýyl sharýashylyǵyn, shaǵyn kásipkerlikti damytýǵa keri áserin tıgizip jáne turǵyndar tarapynan oryndy renishterin týǵyzýda.
«Qalyptasqan jaǵdaıdy Azǵyr óńirindegi shekarany kesip ótý ornyn shekaradan ótkizý pýnkti mártebesine ózgertý arqyly sheshýge bolady. Ol úshin joǵaryda atalǵan Kelisimge jáne qajettigine baılanysty Reseı Federatsııasymen eki aradaǵy basqa da kelisimderge ózgerister men tolyqtyrýlar engizý kerek. Shalǵaıda tabıǵaty qatal, jol qatynasy qıyn shekaralyq aımaqta ómir súrip jatqan azamattarymyzdyń turmys-tirshiligine qolaıly jaǵdaı týǵyzý maqsatynda tıisti memlekettik organdarǵa osy máseleni jan-jaqty qarap, qoldanystaǵy zańnamalyq aktilerge ózgerister men tolyqtyrýlar engizýdi daıyndaý jóninde tapsyrma berýdi usynamyn», - dedi senator S.Eńsegenov.
