Shekara mańyndaǵy óńirlerdi ıdeologııalyq, aqparattyq qamtýdy durys jolǵa qoıý kerek - Q. Aıtahanov
ASTANA. Jeltoqsannyń 8-i. QazAqparat /Qanat Mámetqazyuly/ - Shekara mańyndaǵy óńirlerdi ıdeologııalyq, aqparattyq qamtýdy durys jolǵa qoıý kerek.
Búgin QR Parlamenti Senatynyń Halyqaralyq qatynastar, qorǵanys jáne qaýipsizdik komıtetiniń otyrysyndaǵy «QR keıbir zańnamalyq aktilerine terrorızmge qarsy is-qımyl máseleleri boıynsha ózgerister men tolyqtyrýlar engizý týraly» zań jobasyn talqylaý barysynda senator Qýanysh Aıtahanov osylaı málim etti, dep habarlaıdy QazAqparat.
«UQK basshysy Qazaqstannyń jaqyn kórshiles memleketterinde oryn alýy múmkin terrorıstik qaýip-qaterler yqtımaldyǵy týraly aıtyp ótti. Shyndyǵynda, qazirgi kúni ońtústiktegi Ózbekstanmen shekaraǵa basa nazar aýdarý qajet sekildi. Óıtkeni, búgingi kúni bul eldiń shekarasy myǵym, kúzetilýi qyraǵy. Máselen, Ózbekstannan Qazaqstanǵa qaraı ótip ketem deýshige kóp problema týmaýy múmkin, al kerisinshe Qazaqstannan Ózbekstanǵa qaraı ótý úlken problema. Onyń ústine elimizdegi eńbek-mıgranttarynyń basym bóligi Ózbekstan jaǵynan keletini anyq. Biraq, bulardyń esebi, tekserýden ótýi de tolyq ári anyq emes. Olardyń arasynda áleýetti lańkester de bolýy múmkin ǵoı», dedi senator.
Sonymen birge, Q. Aıtahanov Ońtústik Qazaqstan oblysyndaǵy Ózbekstanmen shekaralas 700 myń halyq qonystanǵan úsh aýdanda aqparattyq qamtamasyz etýdiń tómen deńgeıin sóz etti. Onyń aıtýynsha, ońtústiktegi Saryaǵash, Jetisaı aýdandarynda otandyq, memlekettik aqparattan góri ózbek aqparatyna basymdyq berilip keledi eken. «Osy óńirlerde memlekettik telearnalar, sodan taralatyn aqparattar múldem jetkiliksiz dese de bolady. Endeshe, bul óńirdiń turǵyndary ózbekshe oılap, sol eldiń saıasatyna ıkemdele bastaıdy degen sóz. Sondyqtan da shekara mańyndaǵy óńirlerdi ıdeologııalyq máseleden alshaqtatpaýdy, qaıta ózimizdiń aqparatpen tolyq qamtamasyz etýdi durys jolǵa qoıý kerek», dedi depýtat.
