Shekara mańyndaǵy halyqty jappaı kóshirmeı, kerisinshe olardyń áleýmettik jaǵdaıyn kótergen abzal – B. Smaǵul
ASTANA. 24 qazan. QazAqparat - Shekara mańyn jandandyryp, iri reformalar jasaý qajet. Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Baqytbek Smaǵul osylaı málim etti.
«Bizdiń depýtattyq saýalymyzǵa Almaty oblysy Raıymbek aýdanynyń kóp balaly, aq jaýlyqty analarynyń ashyq hattary negiz bolyp otyr. Cońǵy ýaqyttaǵy elimizdiń shekara beketterindegi oryn alǵan qaıǵyly oqıǵalar shekarany qorǵaýdaǵy memlekettik saıasattyń álsizdigin bildire otyryp, iri reformalardyń qajettiligin dáleldeýde. Atalmysh ashyq hatta Respýblıkanyń shekara aýmaǵyndaǵy turǵylyqty halyqtyń áleýmettik jaǵdaıynyń tómendiginen, aýyl jastary men otbasyly azamattar bala-shaǵa qamy úshin jáne kúndelikti kún kórýdiń amalymen qalaǵa kóship jatqany baıandalǵan», - deıdi depýtat. Bul rette B. Smaǵul atalmysh máseleniń buǵan deıin de talaı kóterilgenin, alaıda belgisiz sebeptermen jaýapsyz qalyp otyrǵanyn atap ótti.
Depýtattyń pikirinshe, shekara aımaǵynda ornalasqan Narynqol óńirinen halyqtyń jappaı kóshýi, mádenı-áleýmettik qurylystardyń ıesizdikke ushyrap, talan-tarajǵa túsip, júzdegen úılerdiń qańyrap, bos qalyp, buzylýyna jol berilgen. Máselen, 1997 jyly Narynqol selosynda 12 myń adam bolsa, búgingi kúni 8,5 myńǵa jýyq qalǵan. Osy shekaraǵa jaqyn ornalasqan Súmbe, Sarybastaý, Tekes, Qyzyl jáne shekaranyń týra tusynda ornalasqan Uzaq aýylynda 5,1 myń adam bolsa, búginde 3 myńǵa jeter-jetpeske azaıǵan. Osyǵan oraı, «bul elimizdiń jańarý - damý úrdisindegi saıasatymyzǵa syn bolary anyq» degen depýtat Narynqoldy selolyq okrýg retinde emes, aýdan ortalyǵy retinde qaıta qurýdy qarastyryp, jedel sheshim qabyldaý qajettigin aıtty.
«El bolamyn deseń - erteńgi kúnińdi oıla» degen qazaǵymnyń ataly sózi bar. Respýblıka aýmaǵyndaǵy shekara aımaǵynda ornalasqan halyqty jappaı kóshirmeı, kerisinshe olarǵa jaǵdaı jasap, áleýmettik jaǵdaıyn kótergenimiz abzal. Ol úshin jergilikti halyqqa úkimet tarapynan josparly - ekonomıkalyq qoldaý qajet. Búgingi damyǵan memleketterde birinshiden strategııalyq shekara aýmaǵyndaǵy halyqty ornyqtyrý úshin áleýmettik-ınfraqurylymdyq qamsyzdandyrý maqsatqa qoıylady. Osy máseleler sheshilgennen keıin ǵana, shekaranyń birtutas myzǵymastyǵynyń negizi bolary anyq», - dedi B. Smaǵul.
«Monoqalalardy damytýdan esh kem túspeıtin bul eldi mekenderdiń jáne ońtústik, batys, shyǵys shekaralaryndaǵy osyndaı eldi mekenderdiń ekonomıkasyn turaqtandyryp, áleýmettik máselelerin sheshýdi qamtıtyn salalyq baǵdarlamalar qabyldanýy kerek dep esepteımiz»,- dedi depýtat.
