Shekara mańynda turatyn halyqqa ústemeaqy tóleý máselesi zerdelenedi

ASTANA. QazAqparat – «Aýyldardy damytýdyń 2023-2027 jyldarǵa arnalǵan tujyrymdamasyna» shekara mańyndaǵy eldi meken turǵyndaryna qosymsha ústemeaqy tóleý máselesi enýi múmkin. Bul jaıynda Ulttyq ekonomıka vıtse-mınıstri Baýyrjan Omarbekov QazAqparat saýalyna joldaǵan jaýabynda jazdy.

«Osyǵan deıin shekara mańyndaǵy aýmaqtardy damytý «Qýatty óńirler – el damýynyń draıveri» Ulttyq jobasyna engen «Aýyl – El besigi» jobasynyń sheńberinde iske asyryldy. Qazirgi tańda «Aýyldardy damytýdyń 2023-2027 jyldarǵa arnalǵan tujyrymdamasy» jobasyna engizildi.

Atalǵan tujyrymdama sheńberinde shekara mańyndaǵy aýmaqtardy damytý jónindegi máselelerge erekshe nazar aýdarylady. Atap aıtqanda, bul tirshilikti qamtamasyz etetin ınfraqurylymdy basym qarjylandyrý; burynǵy aýyldyq aýdandardyń (Katonqaraǵaı, Úlken Naryn, Kúrshim, Marqakól jáne taǵy basqa) mártebesin qalpyna keltirý máselelerine, sondaı-aq jergilikti turǵyndardy qoldaý sharalaryn ázirleýge, onyń ishinde turǵyndarǵa jalaqy men basqa da áleýmettik tólemderge ústemeaqy berý jóninde taldaý men usynystar ázirleýge qatysty máseleler qamtylatyn bolady», - deligen vedomstvo jaýabynda.