Shekara mańynda aýylsharýashylyq jerlerin berýge talaptar aıqyndaldy

ASTANA. QazAqparat - QR Parlamenti Májilisiniń Agrarlyq máseleler komıteti «Qazaqstan Respýblıkasynyń keıbir zańnamalyq aktilerine jer qatynastaryn retteý máseleleri boıynsha ózgerister men tolyqtyrýlar engizý týraly» zań jobasy boıynsha jumysty bastady, dep habarlaıdy QazAqparat.

«Atalǵan zań jobasy Jer reformasy boıynsha komıssııa jumysynyń qorytyndysy aıasynda ázirlendi. Zań jobasynyń negizgi erejeleri jer paıdalaný quqyǵyn berý turǵysynda konkýrstyq komıssııanyń qyzmetin egjeı-tegjeıli retteý arqyly aýyl sharýashylyǵy maqsatyndaǵy jerlerdi berýdiń aıqyn tetikterin belgileýge, sondaı-aq aýyl sharýashylyǵy maqsatyndaǵy jerlerdi tıimdi paıdalanýyn jáne turaqty monıtorıng júrgizý arqyly jer paıdalanýshylardyń ózderine alǵan mindettemelerin oryndalýyna baqylaýdy kúsheıtýge qatysty»,-dep toqtaldy depýtat Saparhan Omarov Májilistiń jalpy otyrysynda.

Onyń sózine qaraǵanda, munymen qosa, memlekettik organdarǵa qazaqstandyqtarǵa jalǵa beriletin aýyl sharýashylyǵy maqsatyndaǵy jer telimderiniń shekti maksımaldy kólemin anyqtaý boıynsha quzyret beriledi.

«Budan basqa, zań jobasymen memleket muqtajyna jeke turǵyn úı qurylysyn damytý jáne aýyl turǵyndaryn jaıylymdyq jerlermen qamtamasyz etý úshin jerdi alyp qoıý múmkin bolatyn erekshe jaǵdaılardyń tizbesi keńeıtilgen. Sonymen qatar qorǵanys muqtajy jáne ulttyq qaýipsizdik úshin jerlerdi berýmen baılanysty máseleler qarastyrylǵan. Shekara mańyndaǵy aýmaqtarda aýyl sharýashylyǵy jerlerin berýge talaptar anyqtalǵan. Jalpy, usynylyp otyrǵan zań jobasyndaǵy normalar jergilikti atqarýshy organdar qyzmetiniń jarııalylyǵynyń damýyna, aýyl sharýashylyǵy jerlerin berý júıesiniń ashyqtyǵyna baǵyttalǵan»,- dedi S. Omarov.