Shekara mańyndaǵy mektepter men medıtsına nysandaryna qoıylatyn normatıvter ózgerýi múmkin

ASTANA. KAZINFORM — «Shekara mańyndaǵy mektepter men medıtsına nysandaryna qoıylatyn normatıvterdi qaıta qaraıtyn zań jobasy ázirlendi. Bul týraly Premer-mınıstr Oljas Bektenov Májilis depýtattarynyń saýalyna bergen jaýapta aıtqan. 

— Úkimet depýtattarmen birlesip «Shekara mańy aýmaqtaryn damytý týraly» zań jobasyn ázirledi. Zań jobasy aıasynda memlekettik organdarmen shekara mańyndaǵy shaǵyn jınaqtalǵan mektepterge, medıtsınalyq pýnktterge, ambýlatorııalar men emhanalarǵa qoıylatyn normatıvterdi qaıta qaraý máselesi pysyqtalyp jatyr, sonymen qatar birqatar jańashyldyqtar kózdelgen, — dep jazylǵan resmı jaýapta.

Úkimettiń málimeti boıynsha, qazir respýblıkanyń shekara mańyndaǵy aýdandarynda 1405 bilim berý uıymy (onyń ishinde: balabaqshalar — 710, mektepter — 658, kolledjder — 37) jumys isteıdi. Al osy bilim nysandarynda 239 myńnan astam oqýshy bilim alady.

Eske salsaq, Májilis depýtaty Nartaı Sársenǵalıev Premer-mınıstrdiń orynbasary Qanat Bozymbaevtyń atyna saýal joldap, «Aýyl el besigi» jobasynyń keıbir sharttaryn ózgertýdi usynǵan edi.