Shekara mańynan janarmaıdy zańsyz áketý 50 paıyzǵa qysqardy – agenttik

ASTANA. KAZINFORM – Qarjylyq monıtorıng agenttigi shekara mańyndaǵy aýmaqtardan benzındi áketý máseleleri boıynsha keńes ótkizdi, dep habarlaıdy vedomstvonyń baspasóz qyzmeti.

Keńeske QR Іshki ister mınıstrligi Ákimshilik polıtsııa komıtetiniń, QR Ulttyq qaýipsizdik komıteti Shekara qyzmetiniń jáne QR Qarjy mınıstrligi Memlekettik kirister komıtetiniń Eksporttyq baqylaý basqarmasynyń basshylyǵy qatysty.

Jıynda «Ótkizý» jedel-aldyn alý is-sharasynyń aıasynda júrgizilgen birlesken jumystardyń qorytyndylary shyǵaryldy. Qabyldanǵan sharalar nátıjesinde benzındi zańsyz áketý faktileri 50 paıyzǵa qysqarǵany aıtyldy.

- Atap aıtqanda, AI-92 markaly benzındi shekaradan zańsyz alyp ótpek bolǵan 534 árekettiń joly kesilip, kináli tulǵalar ákimshilik jaýapkershilikke tartylǵan. Sonymen qatar, otyn tasymaldaýǵa beıimdelgen kólik quraldarynyń elge qaıta kirýiniń 865 áreketi tirkelgen, - dep jazylǵan derekte.

Keńes qorytyndysy boıynsha qatysýshy vedomstvolar munaı ónimderin shekaradan zańsyz áketýge qarsy kúresti júıeli túrde jalǵastyryp, ózara úılestirýdi kúsheıtý týraly sheshim qabyldady.

Aıta keteıik, elimizdegi janarmaı stansalary keler jyldan bastap tekseriledi.