Shekara qyzmetiniń jyl kemesi anyqtaldy
ASTANA. QazAqparat - Shekara vedomstvosy basshylyǵynyń sheshimimen QR UQK ShQ Jaǵalaý kúzetiniń kemeleri men katerler dıvızıonynyń «Semser» shekaralyq kemesi úzdik dep tanyldy. Áskerı-jaýyngerlik qyzmettiń jınaqy teńizdik bólimshesi Kaspııdiń qazaqstandyq bóliginde shekara buzýshylardy ustaýda belsendilik kórsetkeni úshin úzdik atalǵan. Bul týraly QR UQK ShQ baspasóz qyzmetiniń baspasóz qyzmetinen habarlady.
Áskerı zamanaýı «Semser» kemesi 2 rangtegi qazaqstandyq keme bolyp tabylady, ol Oral qalasyndaǵy «Zenıt» zaýytynda «Barys» jobasy boıynsha qurastyrylǵan. Keme 2012 jyly mamyr aıynda teńizge túsirildi. «Semserdiń» óz betinshe júzý qashyqtyǵy 1200 teńiz mıline jetedi, bul degenimiz 10 táýlikten asady. «Barys» jobasynyń ereksheligi sol, munda klımattyq jaǵdaılar, Kaspıı teńiziniń erekshelikteri eskerilip qurastyrylǵan.
Aldyńǵy qatarly shekara kemesine QR Qorǵanys mınıstrliginiń Áskerı-teńiz ınstıtýtynyń túlegi - aǵa leıtenant Azamat Qunapııanov basshylyq etedi. Ol «Semser» shekara kemesiniń eń alǵashqy komandıri bolyp tabylady. Alǵashqy kúnderden-aq atalǵan ofıtser jaqsy nátıjeler kórsetip, úzdikter qatarynan kórinýge kúsh salyp keledi.
«Semser» kemesiniń saqshylary ótken merzim ishinde teńizge 25 ret shyqty, ıaǵnı ol degenimiz 100 táýlikke teń, keme 9490 teńiz mılin júrip ótti. Áskerı kezekshilikti atqarý kezinde shekarashylar: 59 500 metr aý quraldaryn, 175 myń metr kallad quraldaryn, qarmaqtar, 745 astam bekire jáne 28 bekire tuqymdas balyqtardy, ondaǵan ıtbalyqtardy tordan bosatyp, teńizge jiberdi, respýblıkamyzdyń shekarasyn buzǵan birneshe azamatty, teńizge zańsyz shyqqan shaǵyn júzý quraldaryn ustady.
Qyzmetke degen zor jaýapkershilik pen birinshi oryndy jeńip alýyna baılanysty aǵa leıtenant A. Qunapııanov jáne «Semser» kemesiniń ekıpajy QR UQK tóraǵasynyń orynbasary - Shekara qyzmetiniń dırektory general-leıtenant N.Jolamanovtyń atynan dıplommen jáne maqtaý qaǵazymen marapattaldy.
Shekara vedomstvosynyń basshysy «Semser» shekara kemesine qashanda tabystarǵa qol jetkizip, aldyńǵy qatardan kórine berýlerine tilektestigin bildirdi.
