Shekara qyzmetiniń jumysyna qatysty eskertý jasaldy

ASTANA. QazAqparat - Pavlodar oblysy Jelezın aýdandyq soty esirtki zattaryn zańsyz tasymaldaǵan Reseı azamatyna qatysty úkim, al QR UQK Shekara qyzmetiniń dırektory atyna jeke qaýly shyǵardy, dep habarlaıdy QazAqparat tilshisi.

Sot materıaldaryna sáıkes, 2017 jyly 19 jeltoqsanda M. esimdi sottalýshy Qyrǵyzstan Respýblıkasynan Qazaqstan terrıtorııasyna ótken. Memlekettik shekarada ony «Qordaı» shekara qyzmetiniń mamandary tekserdi. Alaıda sol kezde esirtki zattary tabylmady. Biraq 21 jeltoqsanda Qazaqstannan Reseıge ótip bara jatqanda «Úrlitóbe» shekara qyzmeti onyń kóliginen zańsyz zattardy tapqan.

«Sot sheshimimen M. esimdi azamat Qylmystyq kodekstiń 286-baby 1-tarmaǵy jáne 296-baby 2-tarmaǵy boıynsha kináli dep tanylyp, 500 aılyq eseptik kórsetkish, ıaǵnı 1 202 500 teńge kóleminde aıyppul tóleýge mindetteldi. Al «Qordaı» shekaralyq baqylaý bólimi qyzmetkerleri óz mindetterin durys atqarmaı, nasha túrindegi esirtki zattardy memlekettik shekaradan zańsyz ótkizýge jol bergeni úshin QR UQK Shekara qyzmetiniń atyna jeke qaýly shyǵaryldy», - delingen sottyń resmı habarlamasynda.

Aıta keteıik, sottyń jeke qaýlysy memlekettik organdar, qoǵamdyq uıymdar men laýazymdy tulǵalardy tártip buzýshylyqtyń bolǵany jaıynda habardar etýdi kózdeıdi. Bir aıdyń ishinde quziretti mekemeler qolǵa alynǵan sharalar týraly habarlaýǵa mindetti.