Shekara qyzmetiniń sapyna jańa ushqyshtar qosyldy
ASTANA. 5 jeltoqsan. QazAqparat - Shekara qyzmetiniń sapyna oqýyn jańadan bitirgen 18 leıtenant kelip qosyldy. Olardyń barlyǵy da ushqyshtar ustahanasy sanalatyn - eki márte Keńes Odaǵynyń Batyry Talǵat Bıgeldınov atyndaǵy Áýe qorǵanysy kúshteri Áskerı ınstıtýtynyń túlekteri.
Qazirgi tańdaǵy áskerı ushaqtar men tikushaqtardyń kúrdeli qurylymy ushqyshtar quramynyń bilimi men biliktiligin talap etetindigi sózsiz. Sondyqtan, bolashaq ushqyshtarǵa ushýdy basqarý, ushaqty júrgizý, áýe soǵystary men bomba tastaýdy ǵana emes, sonymen qatar ushý apparattarynyń barlyq júıelerin saýatty paıdalanýdy da úıretýge kóńil bólinedi.
Jas ushqyshtardy, shtýrmandardy, bort tehnıkteri men jer betindegi mamandardy QR UQK tóraǵasynyń orynbasary - Shekara qyzmetiniń dırektory Nurlan Jolamanov quttyqtady. Shekara vedomstvosynyń basshysy olardyń aldynda turǵan mindetterge toqtala kelip, qyzmetterine aq jol tiledi.
General-leıtenant N. Jolamanov ushqyshtar daıarlaıtyn joǵarǵy oqý orny túlekteriniń kásibı deńgeıi men biliktiliginiń joǵary ekendigin atap ótti. Ushýǵa degen jastar yqylasynyń árqashanda erekshe bolatyndyǵyn aıta kelip, sheberlikke qol jetkizýdiń kilti leıtenanttardyń ózderine, olardyń daıarlyǵy men jaýapkershiligine baılanysty ekendigin eskertti.
Keshegi kýrsanttar búgin ofıtser bolyp úlken ómirge qanat qaqqaly otyr. Onyń ústine jáı ǵana ofıtserler emes, avıatsııa ofıtserleri. Olar synaqtyń barlyǵynan súrinbeı ótti, tipti memlekettik emtıhanǵa daıyndyq kezinde de ushýdan qol úzgen joq. Árıne, ushý daıyndyǵy boıynsha synaqty da aspanda tapsyrdy. Jas ofıtserlerge basshylyq ókilderi qansha ushý bolsa sonshalyqty sátti qonýdy tiledi.
Búgin olar elimizdiń áýe keńistiginde sharlap, aspan shebin qorǵaýǵa daıyn ekendikterin bildirdi, dep habarlady QR UQK ShQ baspasóz qyzmetinen.
