Shekara qyzmetiniń burynǵy bastyǵy Darhan Dilmanovtyń isi sotqa joldanbady - UQK

ASTANA. QazAqparat – Shekara qyzmetiniń burynǵy dırektory Darhan Dilmanovtyń isi boıynsha derektermen tanystyrý júrip jatyr. Bul týraly QR Ulttyq qaýipsizdik komıteti tóraǵasynyń orynbasary Marat Qalqabaev málim etti, dep habarlaıdy QazAqparat tilshisi.

Búgin Parlament Májilisinde ótken baspasóz máslıhatynda tilshiler UQK ókilinen shekara qyzmetiniń dırektory bolǵan Darhan Dilmanovke qatysty is jaıynda surady.

«Іs áli sotqa joldanǵan joq. Qazir is derekterimen tanystyrý júrip jatyr», - dedi Marat Qalqabaev.

Sonymen qatar ol is boıynsha basqa málimetti jarııalaı almaıtynyn aıtty.

Eske sala keteıik, byltyr maýsym aıynda Ulttyq qaýipsizdik komıteti Qazaqstan-Qytaı shekara beketterinde anyqtalǵan bılikti asyra paıdalaný faktileri boıynsha júrgizip jatqan sotqa deıingi tergeý aıasynda burynǵy UQK tóraǵasynyń orynbasary – shekara qyzmetiniń dırektory, general-leıtenant Darhan Dilmanov jáne basqa da adamdar ustalyp, ýaqytsha ustaý ızolıatoryna qamalǵan bolatyn.

Byltyr 5 sáýirde Memleket basshysynyń ókimimen D. Dilmanov laýazymynan bosatyldy.