Shekara qyzmeti qazan aıynda quny 2,1 mlrd teńge bolatyn zańsyz taýardy anyqtady

ASTANA. KAZINFORM – UQK Shekara qyzmeti 2026 jylǵy qazanda shekara keńistiginde 3 318 zań buzýshyny ustap, 2,1 mıllıard teńgeden asatyn somada taýarlar men júkti zańsyz ótkizýdiń aldyn aldy, dep habarlaıdy QR Ulttyq qaýipsizdiń komıtetiniń baspasóz qyzmeti.

Astana men Almaty áýejaılarynda jalǵan qujatpen shekaradan ótpek bolǵan 19 sheteldik ustaldy
Foto: Ulttyq qaýipsizdik komıtetiniń Shekara qyzmeti

Ulttyq qaýipsizdik komıtetiniń Shekara qyzmeti quzyrly organdarmen birlese otyryp, Memlekettik shekarany kúzetý men qorǵaýdy qamtamasyz etý aıasynda aýqymdy jumys júrgizdi. Shekara keńistiginde ustalǵandardyń arasynda 2 791 shetel azamaty bar.

Sonymen qatar shekara arqyly taýarlar men júkterdi zańsyz ótkizýdiń 1 267 faktisi toqtatyldy. Aldyn alynǵan zańsyz ónimniń jalpy somasy 2,1 mıllıard teńgeden asady.

Kaspıı sý aıdynynda brakonerlikpen aınalysýdyń 119 faktisiniń aldy alyndy. Onyń ishinde 88 kılometr brakonerlik qural, sondaı-aq 933 kılogramm (187 dana) bekire tuqymdas balyq tárkilendi. Osylaısha memleketke keletin 413 mıllıon teńgeden astam shyǵynnyń aldy alyndy.

Shekara qyzmeti óz quzyreti sheńberinde 47 qylmystyq is qozǵap, tergeý sharalaryn júrgizip jatyr. Oǵan qosa 35 mıllıon teńgeden astam aıyppul salynǵan 3 021 ákimshilik is óndiriste tur. Qalǵan faktiler boıynsha materıaldar tıisti sheshimder qabyldaý úshin quqyq qorǵaý jáne sot organdaryna jiberildi.

Osyǵan deıin quny 100 mln bolatyn qustardy shekaradan alyp ótpek bolǵan  adam ustalǵany týraly jazdyq.