Shekara qyzmeti esirtki kontrabandasynyń 501 faktisin toqtatty
ASTANA. KAZINFORM – Shekara qyzmeti 2023 jyldan beri esirtki kontrabandasynyń 501 faktisin toqtatty. Bul týraly Májilis depýtattarynyń saýalyna Premer-Mınıstr Oljas Bektenovtiń jaýabynda aıtylǵan.
«Ulttyq qaýipsizdik komıtetiniń Shekara qyzmeti ótkizý pýnktterinde esirtki zattaryn tasymaldaýǵa kedergi jasaý maqsatynda ıntrýzıvti emes qarap tekserýdiń tehnıkalyq quraldaryn qoldana otyryp, qoljúgin, bagajdy, kólik quraldary men júkterdi, sondaı-aq arnaıy oqytylǵan qyzmettik ıtter arqyly tekserip qaraý boıynsha baqylaýdy júzege asyrady», - dedi Oljas Bektenov.
Úkimet basshysynyń jaýabyna berilgen anyqtamaǵa sáıkes, qazirgi ýaqytta UQK ShQ qyzmetinde 40 birlik rentgen-televızııalyq apparat, 9 birlik ınspektsııalyq-tekserý kesheni, 1782 birlik jeke beınetirkegish, arnaıy úıretilgen 470 ıt bar.
«2023 jyldyń basynan beri UQK ShQ kúshimen esirtki kontrabandasynyń 501 faktisi (2023 jyly – 254, 2024 jyly 9 aıda – 247) toqtatyldy Shekara qyzmetin odan ári materıaldyq-tehnıkalyq jaraqtandyrý máseleleri shekaralyq qaýipsizdikti qamtamasyz etýdiń 2024-2028 jyldarǵa arnalǵan keshendi josparynda jáne Qazaqstan Respýblıkasynda nashaqorlyqqa jáne esirtki bıznesine qarsy kúrestiń 2023-2025 jyldarǵa arnalǵan keshendi (4,5 mlrd teńgeden astam somaǵa) josparynda kózdelgen», - dep atap ótedi Premer-Mınıstr.
