Shekara boıyndaǵy túlekterdiń kórshiles eldiń oqý oryndaryna áýestigi azaımaı tur
PAVLODAR. KAZINFORM — Pavlodar oblysynda bıyl 11-synypty 5 482 túlek támamdaıdy. Olardyń 1 589-y aýyldyq mektepterdiń túlekteri.
Óńirlik bilim berý basqarmasynyń dereginshe, bıylǵy oqý jylynda oblysta 362 jalpy bilim beretin mektep jumys istep tur. Olarda jalpy sany 115,9 myń oqýshy bilim alyp jatyr.
— 11-synyptardy 5 482 túlek támamdasa, olardyń ishinde 1589 túlek aýyldyq jerlerde. Negizgi UBT-ǵa 4934 túlek, ıaǵnı mektep bitirýshilerdiń 90%-y qatysýda. Testileý 10 mamyr men 10 shilde aralyǵynda elektrondyq formatta eki testileý ortalyǵynda ótip jatyr. Qańtar men naýryz aılaryndaǵy UBT-ǵa túlekterdiń shamamen 90%-y qatysty. Eń joǵary nátıje — 137 ball eki túlekke tıesili. Olardyń biri Aqsý qalasy Qyzyljar aýylyndaǵy orta mektepti, ekinshisi Pavlodar qalasyndaǵy A. Baıtursynuly atyndaǵy mektepti bitirgeli otyr, — dep habarlady Kazinform tilshisine óńirlik bilim berý basqarmasy basshysynyń orynbasary Nurgúl Azanbaeva.
Oblysta ózge eldiń oqý oryndaryn tańdaıtyn túlekterdiń sany azaımaı turǵany baıqalady. Jyl saıyn túlekterdiń shamamen 90%-y elimizdiń oqý oryndaryna túsedi. Sońǵy 5 jylda oblys mektepterin shamamen 22 myń túlek bitirse, olardyń 19,7 myńy Qazaqstannyń joǵary oqý oryndary men kolledjderinde bilimin jalǵastyrǵan. Byltyr oblys mektepterin 5 048 túlek bitirse, olardyń 12 paıyzy, ıaǵnı 600-i jaqyn jáne alys sheteldiń joǵary oqý oryndary men kolledjderine túsken. Sonyń ishinde shekara boıyndaǵy Jelezın, Ýspen, Sharbaqty, Tereńkól aýdandarynyń túlekterdiń deni reseılik JOO-lardy tańdaıtyny baıqalady. Mamandar mundaı tendentsııa azaımaı turǵanyn aıtady.
Atap óterligi, 2025 jyly túlekterdiń shamamen 42%-y IT, ınjenerııa, avtomattandyrý jáne tsıfrlyq tehnologııalar baǵyttaryn tańdaǵan. Jastardyń atalǵan salalarǵa qyzyǵýshylyǵynyń ósý úrdisi baıqalady.
Buǵan deıin Qazaqstanda mektep túlekteri sońǵy qońyraýǵa qansha teńge jumsaıtyn jazǵanbyz.
