Shekara bólimderindegi qurylys jumystary ne sebepti keshigip jatyr
ASTANA. KAZINFORM — Búgin Senatta QR Ulttyq qaýipsizdik komıteti Shekara qyzmetiniń shekara bólimderiniń ǵımarattary men qurylysjaılaryn salý jáne jańǵyrtý taqyryby qaraldy. Onyń barysynda shekara bólimderin salý kezindegi kemshilikter málim boldy.

— 2024-2028 jyldarǵa arnalǵan shekara qaýipsizdigin qamtamasyz etýdiń keshendi josparynda 50 beket boıynsha qurylys jumystary qarastyrylǵan. Baǵdarlamanyń ákimshisi retinde Kólik mınıstrligi bekitilgen. 2023 jyly 20 shekara bólimshesin salý qarastyrylǵan. Alaıda tıisti merzimde bul nysandar tapsyrylmady, — dedi QR Ulttyq qaýipsizdik komıtet tóraǵasynyń orynbasary — Shekara qyzmetiniń dırektory Erlan Aldajumanov.
Onyń aıtýynsha, qazirgi kezde 20 shekara bólimshesine qatysty qosymsha jobalaý-smetalyq qujattama ázirlenip jatyr. Qalǵan 10 bólimshe boıynsha Ulttyq eknomıka mınıstrliginen ekonomıkalyq negizdeme alý josparlanǵan.
— 2024 jyldyń jeltoqsan aıynda Senattyń Halyqaralyq qatynastar, qorǵanys jáne qaýipsizdik komıtetiniń músheleri Soltústik Qazaqstan oblysyna sapary kezinde shekara bóliminiń qurylysyna qatysty naqty jaǵdaıdy kórdi. Osyndaı jaǵdaı qurlysy aıaqtalmaǵan 19 nysanda da baıqalyp otyr. Olardyń keıbirinde irgetasyn qalaý jumystary da aıaqtalmaǵan. Qazir oryndalǵan jumystyń jalpy kórsetkishine toqtalsaq, 60-80 paıyzdan aspaıdy. Osy másele boıynsha túrli alańdarda ótken jıyndarda Kólik mınıstrliginiń, merdigerlerdiń ókilderin tyńdap shyqtyq. Bul rette, aıyppul salý sanktsııalary eshqandaı nátıje bermedi. Sonyń saldarynan atalǵan nysandardyń qurylysyn aıaqtaý merzimi 2025 jylǵa aýystyryldy. Bul jaǵdaı elimizdiń soltústik óńirlerindegi shekarada qorǵanys qabiletin kúsheıtýge bólingen bıýdjet qarajatyn tıimdi paıdalaný jumysyna nuqsan keltirip jatyr, — dedi Shekara qyzmetiniń dırektory.
Senator Andreı Lýkın jaqynda SQO aýmaǵyndaǵy shekara bólimshelerine depýtattar barǵanyn eske saldy.
— Sol kezde qurylys toqtap, jumys júrgizilmeı jatqanyn óz kózimizben kórdik. Ony toqtatýdyń sebebin anyqtaýǵa tyrystyq, biraq naqty jaýap ala almadyq… Osy máseleni Májilis jáne Senat depýtattary keıingi 3 jylda birneshe ret kótergen edi. Zańnamalyq baza bar, tıisti qarjy bólinip jatyr. Degenmen, másele áli de sheshilmegen. Mundaı jaǵdaılarda Bas prokýratýra qadaǵalaýshy organ retinde «Memlekettik satyp alý týraly» Zańnyń durys oryndalýyn, al Qarjylyq monıtorıng agenttigi men Antıkor Memleket basshysynyń memlekettik satyp alý jáne bıýdjet qarajatynyń maqsatty jumsalýyn qadaǵalaý jónindegi tapsyrmalarynyń qalaı oryndalyp jatqanyn tekserýge mindetti, — dedi A. Lýkın.
Eske sala keteıik, Qyrǵyzstan men Tájikstan memlekettik shekara máselesin túpkilikti qashan sheshetinin jazǵan bolatynbyz.