Shekara bólimderin salýdaǵy problema: qurylys 2025 jyly aıaqtalady
ASTANA. KAZINFORM — QR Kólik vıtse-mınıstri Sátjan Ablalıev soltústik óńirlerdegi shekara bólimderiniń ǵımarattary men qurylysjaılaryn salý jumystary nelikten kesheýildegenin túsindirdi.
Aıta keteıik, QR Ulttyq qaýipsizdik komıteti Shekara qyzmetiniń el óńirlerindegi bólimsheleriniń qurylysyna qatysty baǵdarlamanyń ákimshisi retinde Kólik mınıstrligi bekitilgen. Búgin Senatta osy taqyrypqa qatysty ótken otyrystan keıingi baspasóz máslıhatynda jaýapty vedomstvo ókilderi shekara bólimshelerindegi jaǵdaıǵa túsinik berdi.
Sátjan Ablalıev 2023 jyly qurylys jumystarynda qarjylandyrý tolyq bolmaǵanyn, al 2024 jyly sý tasqyny kezindegi qıyndyqtar áser etkenin atap ótti.
Onyń aıtýynsha, jumys kestesin buzǵan merdiger uıymdarǵa aıyppul salý týraly eskertý joldanǵan, al 20 nysan qurylysynyń birinshi kezeńin 2025 jyly aıaqtaý josparlanypty.
— 2028 jyldyń aıaǵyna deıin jalpy 50 bólimsheniń qurylysy tapsyrylýy kerek. Olar negizinen Reseımen aradaǵy shekarada bolady. Qazirgi kezde onyń 20-synda qurylys jumystary júrip jatyr. Atap aıtqanda, 54 mlrd teńgege osy 20 shekara bólimshesi salynady, — tilshiler suraǵyna jaýap bere otyryp.
Vıtse-mınıstr 20 bólimsheniń qurylysy 2025 jyly jalǵasatynyn jáne oǵan qosymsha qarajat bólinbeıtinin aıtty.
— Merdiger kompanııa men tapsyrys berýshiler bólingen qarajat boıynsha nysandardy salady. Jalpy, bul máselede buǵan deıin qarajatty ýaqytynda bólmeý derekteri boldy jáne merdigerdiń tolyq mobılızatsııa jasamaýy kemshiligi oryn aldy. Soǵan baılanysty qazir ortaq sheshimge kelip, bólingen qarajattyń kóleminde 2025 jyly nysandardyń qurylysyn aıaqtaýǵa kelistik. Qazir merdigerdi aýystyrý tıimdi bolmaıdy dep sanaımyz. Sebebi, atqarylatyn qalǵan jumystar sonshalyqty aýqymdy emes. Al jańa merdigerdi irikteýge taǵy qosymsha ýaqyt pen qarajat kerek. Sondyqtan osy merdigermen nysandardy paıdalanýǵa beremiz. Atap aıtqanda, budan basqa salynatyn 30 shekara bólimshesine jańadan satyp alý protsesi uıymdastyrylyp, basqa kompanııalar irikteledi, — dedi Sátjan Ablalıev.
Budan buryn habarlanǵandaı, búgin Senatta QR Ulttyq qaýipsizdik komıteti Shekara qyzmetiniń shekara bólimderiniń ǵımarattary men qurylysjaılaryn salý jáne jańǵyrtý taqyryby qaraldy. Onyń barysynda shekara bólimderin salý kezindegi kemshilikter málim boldy.
QR Ulttyq qaýipsizdik komıtet tóraǵasynyń orynbasary — Shekara qyzmetiniń dırektory Erlan Aldajumanovtyń sózine qaraǵanda, 2024-2028 jyldarǵa arnalǵan shekara qaýipsizdigin qamtamasyz etýdiń keshendi josparynda 50 beket boıynsha qurylys jumystary qarastyrylǵan. Baǵdarlamanyń ákimshisi retinde Kólik mınıstrligi bekitilgen. 2023 jyly 20 shekara bólimshesin salý qarastyrylǵan. Alaıda tıisti merzimde bul nysandar tapsyrylmaı keledi.
Otyrys barysynda bıýdjet qarjysyn maqsatty túrde paıdalanýǵa baqylaýdy kúsheıtý máselesi men tapsyrys berýshiler, merdigerler jáne qadaǵalaý organdary arasyndaǵy ózara is-qımyldy jaqsartý jónindegi usynystar talqylandy. Senatorlar qurylys merzimin saqtaý jáne ekinshi kezeńdegi qurylysqa arnalǵan jobalaý-smetalyq qujattamany ázirleý qajettigine erekshe nazar aýdardy. Ekinshi kezeń aıasynda taǵy 30 shekaralyq nysan salý josparlanyp otyr.
Kezdesýge qatysýshylar barlyq taraptyń mindettemelerdi qatań oryndalýy mańyzdy ekenin jáne mundaı aıryqsha jobalardy júzege asyrýda jaýapkershilikti arttyrý qajettigin atap ótti.