Shekara beketterindegi jóndeýge baılanysty kólik pen adamdardyń ótýi shekteledi

ASTANA. QazAqparat –Eýrazııalyq ekonomıkalyq odaq elderimen shekaradaǵy ótkizý pýnkteriniń qabileti 8 esege ulǵaıtylady. Bul týraly QR Qarjy mınıstrligi Memlekettik kirister komıteti Baqylaý departamentiniń dırektory Eldos Saýdabaev aıtty, dep habarlaıdy QazAqparat tilshisi.

«Bizdiń basym maqsattarymyzdyń biri – Eýrazııalyq ekonomıkalyq odaq elderiniń kedendik shekarasynda ornalasqan ótkizý pýnkteriniń ınfraqurylymdyq mindetterin sheshý. Ótken jyldan bastap barlyq 10 ótkizý pýnkti boıynsha qurylys-montaj jumystary bastaldy. Ózbek tarapynyń kelisimimen «Qaplanbek» (Qazaqstan) jáne «Zangıota» (Ózbekstan) avtomobıl ótkizý pýnkteri rekonstrýktsııaǵa tolyǵymen jabyldy», - dedi Eldos Saýdabaev Ortalyq kommýnıkatsııalar qyzmetindegi baspasóz máslıhatynda.

Onyń atap ótýinshe, qalǵan ótkizý pýnkterinde qaıta jańartý jappaı júrgiziledi. Avtokólik pen jeke tulǵalardyń qozǵalysy shekteledi. Barlyq ótkizý pýnkterin qaıta jańartýdy 2024 jyldyń sońynda aıaqtaý josparlanǵan.

«Jobany iske asyrý aıasynda ótkizý qabileti 8 esege deıin ulǵaıtylady, ýaqyt qysqarady jáne sybaılas jemqorlyq táýekelderi barynsha azaıtylady. Ótkizý pýnkterin jańǵyrtý aıaqtalǵannan keıin olardyń barlyq ınfraqurylym máselesi sheshiledi. Shekaradan yńǵaıly ótý jáne baqylaýdy jedeldetip júrgizý úshin barlyq jaǵdaı jasalady», - dedi departament dırektory.