Shekara aýmaǵyndaǵy egistik jerler tek Qazaqstan azamattaryna beriledi
ASTANA. QazAqparat - Parlament Májilisiniń jalpy otyrysynda QR Premer-Mınıstriniń orynbasary - Aýyl sharýashylyǵy mınıstri Asqar Myrzahmetov shekaralyq beldeý men shekara aýmaǵyndaǵy jerdi paıdalaný jaıynda baıandady, dep habarlaıdy QazAqparat.
«Zań jobasynda shekaralyq beldeý men shekara aýmaǵynda ornalasqan jer ýchaskelerin sheteldikterge, azamattyǵy joq adamdarǵa, Qazaqstan Respýblıkasynyń sheteldiktermen nekede turǵan azamattaryna nemese sheteldik zańdy tulǵalarǵa jáne Qazaqstannyń quramynda sheteldikter bar zańdy tulǵalaryna berýge tyıym salynady. Memlekettik shekaranyń shekara aýmaǵynda ornalasqan aýyl sharýashylyǵy jerleri tek Qazaqstan Respýblıkasynyń azamattary men zańdy tulǵalaryna ǵana jalǵa berý quqyǵynda beriletin bolady», - dedi A. Myrzahmetov jer qatynastaryn retteý zań jobasy boıynsha baıandamasynda
Al memlekettik shekaranyń shekaralyq beldeýinde ornalasqan aýyl sharýashylyǵy jerleri qazaqstandyqtarǵa da berilmeıdi.
«Atalǵan aýmaqtarda aýyl sharýashylyǵy jerlerin jergilikti halyqtyń muqtajdyqtary, ıaǵnı jaıylym, shabyndyq retinde ǵana paıdalanýǵa ruqsat etiledi», - dep naqtylady ol.
Aıta keteıik, Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine jer qatynastaryn retteý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldady.
