Shekara arqyly esirtki ótkizýmen aınalysqan sheteldikter sottaldy - QR UQK

NUR-SULTAN. QazAqparat – QR Memlekettik shekarasyn zańsyz kesip ótken jáne esirtki kontrabandasymen aınalysqan sheteldikter sottaldy, dep habarlaıdy QazAqparat QR UQK baspasóz qyzmetine silteme jasap.

2021 jylǵy qazanda Shekara qyzmeti men UQK Mańǵystaý oblysy boıynsha departamenti Kaspıı teńizi sý aılaǵyndaǵy birlesken is-sharalar barysynda Qazaqstan Respýblıkasynyń Memlekettik shekarasyn qasaqana zańsyz kesip ótkeni úshin eki shetel azamaty bar «Amýr» tıpti shaǵyn kemeni ustaǵan.

Júzý quralyn tekserý barysynda salmaǵy 14 kg «apıyn», 8 kg «gashısh» jáne «metadon» psıhotroptyq zatynyń 29 plastınasy tabylyp, tárkilendi.

2021 jylǵy jeltoqsanda ustalǵandardyń biri 392-baptyń 1-bóligi (Qazaqstan Respýblıkasynyń Memlekettik shekarasyn qasaqana zańsyz kesip ótý) boıynsha kináli dep tanylyp, 5 jyl merzimge QR sheginen shyǵarýmen 6 aıǵa bas bostandyǵynan aıyryldy.

2022 jylǵy 10 naýryzda Mamandandyrylǵan aýdanaralyq sot ekinshi sheteldik azamatty Qylmystyq kodekstiń 286-baby 4-bóligi (aınalystan alyp qoıylǵan zattardyń nemese aınalysy shektelgen zattardyń kontrabandasy), 297-baby 3-bóligi 1, 3-tarmaqtary (esirtki quraldaryn, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý) jáne 392-baby 1-bóligi (Qazaqstan Respýblıkasynyń Memlekettik shekarasyn qasaqana zańsyz kesip ótý) boıynsha kináli dep tanydy. Ol jazasyn qylmystyq-atqarý júıesiniń qaýipsizdigi barynsha joǵary mekemesinde óteýmen 17 jylǵa bas bostandyǵynan aıyryldy.