Shegirtkeniń qaptaǵanyn kórsetetin beınejazbanyń bári ras emes - AShM

ASTANA. KAZINFORM — Aýyl sharýashylyǵy alqaptarynda úıirli shegirtkelerge qarsy hımııalyq óńdeý jumystary jalǵasýda.

AShM dereginshe, búgingi tańda josparlanǵan kólemniń 80,1 paıyzy, ıaǵnı 1,7 mln gektar jer óńdeldi.

- Túrkistan oblysynda jumystar is júzinde aıaqtaldy — 371 myń gektardan astam alqap óńdeldi.

Jambyl oblysynda 81,3 myń gektar jerge hımııalyq óńdeý júrgizildi.

Elimizdiń taǵy 13 óńirinde óńdeý jumystary jalǵasýda.

Aqtóbe oblysynda – 351 myń ga, Qostanaı oblysynda – 345,7 myń ga, Batys Qazaqstan oblysynda – 177,5 myń ga, Qyzylorda oblysynda – 58,6 myń ga, Qaraǵandy oblysynda – 34,2 myń ga kóleminde kúres sharalary júzege asyryldy, - delingen vedomstvo aqparatynda.

Bul sharalarǵa jalpy 443 birlik arnaıy búrký tehnıkasy tartylǵan, onyń ishinde 24 ushaq, 49 ushqyshsyz ushý apparaty jáne 30-dan astam asa jeńil avıatsııa tehnıkasy bar.

- Sonymen qatar, áleýmettik jelilerde Atyraý, Batys Qazaqstan jáne Qostanaı oblystarynda shegirtkeniń jappaı qaptaýy týraly beınematerıaldar taraýda.

Árbir jarııalanym boıynsha jan-jaqty tekserý júrgizilýde. Mundaı materıaldardyń kópshiligi faktilermen rastalmaıtyny jáne shynaıy jaǵdaıdy kórsetpeıtini anyqtaldy.

Búgingi kúni atalǵan óńirlerdiń barlyǵynda hımııalyq kúres jumystary josparǵa saı júrgizilýde, aýyl sharýashylyǵy daqyldarynyń zaqymdaný derekteri tirkelgen joq, - delingen aqparatta.

Aıta keteıik, Qazaqstan men Qyrǵyzstan shekarasynda shegirtkege qarsy birlesken tekserý bastaldy.