Shegirtkemen kúres: mınıstr avıatsııa sanyn arttyrýdy tapsyrdy

ASTANA. KAZINFORM — Aıdarbek Saparov Qyzylorda jáne Aqtóbe oblystaryndaǵy shegirtkege qarsy is-sharalardy qatań baqylaýda ustaýdy tapsyrdy. Bul týraly AShM baspasóz qyzmeti habarlady. 

Qyzylorda qalasynda Aýyl sharýashylyǵy mınıstri Aıdarbek Saparovtyń tóraǵalyǵymen Qyzylorda jáne Aqtóbe oblystary aýmaǵynda shegirtkege qarsy kúres sharalaryn júrgizý máseleleri boıynsha keńes ótti.

Keńeske Qyzylorda oblysynyń ákimi Nurlybek Nálibaev qatysty, sondaı-aq beınebaılanys rejıminde Aýyl sharýashylyǵy mınıstrligi Agroónerkásiptik keshendegi memlekettik ınspektsııa komıtetiniń ókilderi, Aqtóbe oblysynyń ákimi Ashat Shaharov jáne eki oblystyń aýdan ákimderi qosyldy.

— Aımaqtaǵy jaǵdaımen tanystym. Qolaısyz aýa raıyna qaramastan, óńdeý jumystary jalǵasyp jatyr Shegirtkeler bar, biraq egistik alqaptarynda emes. Jumysty kúsheıtińder, avıatsııa sanyn arttyryńdar. Eger aýa raıy múmkindik bermese — jerústi tehnıkasyn kóbirek tartyńdar, — dep atap ótti Aıdarbek Saparov.

AÓK-degi memlekettik ınspektsııa komıteti tóraǵasynyń mindetin atqarýshy Sáken Qanybekovtiń aıtýynsha, Qyzylorda oblysynda óńdeýge josparlanǵan jalpy aýmaq 60,024 myń gektar. 27 mamyrdaǵy jaǵdaı boıynsha josparlanǵan 19 myń gektardyń 13 myń gektary óńdeldi. Jumysqa 4 ushaq, 2 jeńil ushaq, 4 dron jáne 12 jerústi jeldetkish qondyrǵysy jumyldyrylǵan.

Aqtóbe oblysynda óńdeýge josparlanǵan aýmaq 512,960 myń gektar, onyń ishinde 52 myń gektarǵa jýyq jer óńdeldi. Óńirde ushaqtar, jeldetkish qondyrǵylar men aerozol generatorlary — jalpy 45 tehnıka jumyldyrylǵan.

Keńes barysynda óńirler ókilderiniń baıandamalary tyńdalyp, ózekti máseleler men uıymdastyrý jumystary talqylandy.

Keńesti qorytyndylaı kele, mınıstr hımııalyq óńdeýlerdiń sapaly jáne ýaqtyly júrgizilýiniń, vedomstvoaralyq ózara is-qımyldy kúsheıtýdiń jáne barlyq tıisti qurylymnyń jaýapkershiligin arttyrýdyń mańyzdylyǵyn atap ótti.

— Shegirtkemen kúrestiń tıimdiligi úılestirilgen ári jedel áreketke tikeleı baılanysty. Barlyq tapsyrmalar qatań baqylaýǵa alynýy tıis, — dedi Aıdarbek Saparov.

Aıta ketelik Qaraǵandy oblysynda úıirli shegirtkege qarsy fıtosanıtarııalyq sharalar júrgizilip jatyr.