Shegirtkemen kúres: Qyzylordada oblystyq shtab quryldy

QYZYLORDA. KAZINFORM — Bıyl Qyzylorda oblysynda azııalyq shegirtkege qarsy 33 350 gektar, ıtalııalyq prýsqa qarsy 31 830 gektar, saıaq shegirtkege qarsy 55 540 gektar jer óńdeledi.

Aýyl sharýashylyǵy mınıstrligi agroónerkásiptik keshendegi memlekettik ınspektsııa komıtetiniń oblystyq aýmaqtyq ınspektsııasy málimdegendeı, óńirde zııankestiń dál osy úsh túri keńinen taraǵan.

— Ótken jyly mundaı jumys Aral, Qazaly aýdandarynda qarqyndy túrde júrgizildi. Aqtóbe oblysymen shekaralas tusta kóptegen jyl boıy hımııalyq óńdeý kórmegen aýmaqtar boldy. 33 myń gektar jerden ózimiz boljaǵandaı ıtalııalyq prýs shyqty. Jeldi kúnderi jerdi ýlaý tıimsiz eken. Pestıtsıd sýmen aralasyp, keýip ketedi. Sondyqtan avıatsııa qyzmetine júginý qajet boldy. Hımııalyq óńdeýden ótken jerde zııankes múldem joıylyp ketpeıdi. 15%-nan dernásil ósip shyǵady. Oblystaǵy óńdeletin jerdiń negizgi bóligi soltústiktegi eki aýdanda. Al azııalyq shegirtkege qarsy kúres is-sharalary negizinen kúrish sharýashylyǵyna beıimdelgen Jańaqorǵan, Shıeli, Syrdarııa, Jalaǵash aýdandary men Qyzylorda qalasynda atqarylady, — dedi ınspektsııa basshysy Muhtar Orazbaev. 

Ótken jyly azııalyq shegirtkege qarsy 35 322 gektar, ıtalııalyq prýsqa qarsy 35 360 gektar, saıaq shegirtkege qarsy 55 394 gektar jer ýlandy. Erte kóktemnen bastap bas kóteretin qaýipti jándikten qutylýǵa qazirden qam jasalyp jatyr. Osy baǵytta oblys ákimi orynbasarynyń jetekshiligimen óńirlik shtab quryldy. 

Eske salaıyq, byltyr respýblıka aýmaǵynda egistik alqaptaryna, jaıylymdar men shabyndyqtarǵa shegirtkeden zııan kelgen joq.