Shegirtkege qarsy kúreske 100-den astam dron jumyldyrylady
ASTANA. KAZINFORM — Shegirtke zııankesterine qarsy kúres maýsymyna daıyndyq aıasynda ushqyshsyz ushý apparattary parkin ázirleý jumystary tolyq aıaqtaldy. Bıyl aýyl sharýashylyǵy alqaptaryn núktelik ádispen hımııalyq óńdeý úshin 46 agrodrondy paıdalaný josparlanǵan. Bul týraly AShM málim etti.
Belgili bolǵandaı, úıirli shegirtke túrleri dala, shól jáne taýly aımaqtarda, sondaı-aq ózen ańǵarlarynda taralady. Mundaı jerlerde jerústi tehnıkany qoldaný qıyndyq týdyrady. Sondyqtan ushqyshsyz ushý apparattaryn paıdalaný zııankester oshaqtaryn jedel anyqtaýǵa múmkindik beredi, monıtorıng júrgizý úderisin edáýir jedeldetedi jáne zertteletin aýmaqtardyń qamtý aıasyn keńeıtedi.
Maýsymǵa daıyndyq barysynda mamandar jabdyqtardyń tehnıkalyq jaı-kúıine keshendi tekserý júrgizdi. Ushý qaýipsizdigine, búrký júıeleriniń tıimdiligine jáne basqarý júıeleriniń turaqtylyǵyna erekshe nazar aýdaryldy.
Sońǵy jyldary aýyl sharýashylyǵy alqaptaryna monıtorıng júrgizetin «Fıtosanıtarııalyq qaýipsizdik jáne boljamdar ádistemelik ortalyǵy» RMK-nyń tehnıkalyq parki aıtarlyqtaı keńeıdi. Máselen, byltyr ortalyq 2024 jyldyń sońynda satyp alynǵan 7 drondy paıdalansa, 2025 jyldyń jeltoqsanynda qosymsha 50 qurylǵy satyp alyndy.
Osylaısha, qadaǵalaý barysynda 57 ushqyshsyz ushý apparatyn paıdalaný maýsymǵa daıyndyq deńgeıin aıtarlyqtaı arttyryp, fıtosanıtarııalyq qaýipterge tıimdi ári jedel áreket etýge jol ashady.
Aıta keteıik, buǵan deıin Qazaqstan men Reseı shegirtkege qarsy birlesken jospar ázirleıtinin jazdyq.
