Shegirtkege qarsy kúres tsıfrlandyrylmaq
ASTANA. KAZINFORM — Aýyl sharýashylyǵy mınıstrliginde vıtse-mınıstr Ermek Kenjehanulynyń tóraǵalyǵymen agroónerkásiptik keshende (AÓK) memlekettik baqylaýdy kúsheıtý jáne shegirtke zııankesterimen kúrestiń tıimdiligin arttyrý úshin zamanaýı tsıfrlyq sheshimderdi engizý máseleleri boıynsha keńes ótti.
Oǵan oblys ákimdikteri ókilderi qatysyp, tuqym sharýashylyǵy men astyq naryǵy salalaryndaǵy ınspektsııalyq qyzmettiń negizgi mindetteri, sondaı-aq fıtosanıtarııalyq qaýipsizdikti qamtamasyz etý sharalary qaraldy. Memlekettik baqylaýdyń tıimdi júıesi aýyl sharýashylyǵy ónimderiniń sapasyna kepildik berýdiń, táýekelderdi tómendetýdiń jáne salanyń turaqty damýynyń negizi ekeni aıtyldy.
Birqatar baǵyt boıynsha, atap aıtqanda tuqym sharýashylyǵy men astyq naryǵynda tekserý kólemi jetkiliksiz bolǵandyqtan, jergilikti atqarýshy organdarǵa beıindi mamandar sanyn arttyrý jáne jergilikti jerlerde qadaǵalaý qyzmetin kúsheıtý máselesin pysyqtaý tapsyryldy.
Sonymen qatar, salany retteýdi jetildirýge baǵyttalǵan normatıvtik-quqyqtyq bazadaǵy problemalyq máseleler men aldaǵy josparlar nazardan tys qalmady.
Fıtosanıtarııalyq qaýipsizdik bóliginde ákimdikterge AÓK-degi memlekettik ınspektsııa komıtetiniń aýmaqtyq bólimshelerimen birlesip, shegirtke zııankesterine qarsy qorǵanys sharalaryn júrgizýdi úılestirýdi kúsheıtý jáne olardyń taralýynyń aldyn alý, sonyń ishinde kórshiles memleketter aýmaǵynda da baqylaýdy qamtamasyz etý tapsyryldy.
Búginde zııankester oshaǵyn ýaqtyly anyqtaýǵa, qaýip-qaterlerge jedel áreket etýge jáne qabyldanatyn sharalardyń nátıjeliligin arttyrýǵa múmkindik beretin monıtorıng pen boljaýdyń tsıfrlyq quraldary belsendi qoldanylýda.
Qabyldanǵan sheshimder memlekettik baqylaý júıesin nyǵaıtýǵa, aýyl sharýashylyǵy ónimderiniń sapasyn arttyrýǵa jáne eldiń azyq-túlik qaýipsizdigin qamtamasyz etýge baǵyttalǵan.
Aıta ketelik 2026 jyly shegirtkege qarsy hımııalyq óńdeý kólemi 2,2 mln gektar bolady.