Shegirtkege qarsy hımııalyq óńdeý jumystary 90%-dan asty

ALMATY. KAZINFORM – Premer-mınıstrdiń orynbasary – ulttyq ekonomıka mınıstri Serik Jumanǵarınniń tóraǵalyǵymen shegirtkeniń taralýyna qarsy is-qımyl jónindegi respýblıkalyq shtabtyń otyrysy ótti.

Úkimettiń baspasóz qyzmetiniń habarlaýynsha, Túrkistan jáne Jambyl oblystarynda marokkalyq shegirtkege qarsy hımııalyq óńdeý jumystary aıaqtaldy. Qazirgi ýaqytta 15 óńirde ıtalıalyq prýsqa jáne 8 óńirde azııalyq shegirtkege qarsy kúres sharalary jalǵasyp jatyr.

Aýyl sharýashylyǵy mınıstrliginiń málimetinshe, shekaralas aýmaqtardaǵy shegirtke oshaqtary men kórshiles elderden ushyp kelý qaýpine baılanysty turaqty monıtorıng júrgizilip jatyr.

«Qytaı men Qyrǵyzstan tarapynan qaýip joq. Reseı men Ózbekstanmen shekaralas aımaqtarda tekserýler júrgizilip jatyr. Oshaqtar anyqtalǵan joq. Kórshiles elderdiń mamandarymen birlesip zertteý jumystary jalǵasýda», — dedi aýyl sharýashylyǵy vıtse-mınıstri Azat Sultanov.

Sonymen qatar shtab otyrysynda 2025 jylǵy kóktemgi dala jumystarynyń qorytyndysy shyǵaryldy.

Jalpy egis alańy 23,7 mln gektardy qurady. Onyń ishinde dándi daqyldar – 15,6 mln gektarǵa, maıly daqyldar – 3,4 mln gektarǵa, júgeri – 168 myń gektarǵa, kartop – 127,8 myń gektarǵa, qant qyzylshasy – 17,7 myń gektarǵa egildi.

Osyǵan deıin Qazaqstan men Qyrǵyzstan shekarasynda shegirtkege qarsy birlesken tekserý bastalǵany týraly jazdyq.