Shegirtke tektes zııankesterge qarsy kúres naýqany sátti aıaqtaldy — AShM

ASTANA. KAZINFORM — Respýblıka aýmaǵynda egistik alqaptaryna, jaıylymdar men shabyndyqtarǵa shegirtkeden zııan kelgen joq. Bul týraly AShM Agroónerkásiptik keshendegi memlekettik ınspektsııa komıteti tóraǵasynyń orynbasary Saıat Saqmoldın aıtty.

— Jalpy shegirtke tektes zııankesterge qarsy kúresti ýaqytyly jáne sapaly uıymdastyrý — elimizdiń azyq túlik azyq qaýipsizdigin qamtamasyz etý jolyndaǵy basym baǵyttardyń biri. Osyǵan baılanysty, Aýyl sharýashylyǵy mınıstrligi oblys ákimdikterimen birlese otyryp, barlyq qajetti sharany qabyldady. Bıyl respýblıka aýmaǵynda úıirli shegirtke tektes zııankesterge qarsy kúres sharalary 2,7 mln gektar alańda júrgizilip, búginde elimizdiń barlyq óńirinde óńdeý jumystary tolyǵymen aıaqtaldy. Bul kórsetkish ótken jylmen salystyrǵanda 400 myń gektarǵa tómen, — dedi ol Ortalyq kommýnıkatsııalar qyzmetindegi brıfıngte.

Onyń atap ótýinshe, shegirtkemen kúres sharalaryn ýaqytyly jáne sapaly júrgizý maqsatynda atalǵan baǵyttaǵy jumystardy úılestirý úshin barlyq óńirde oblys ákiminiń ókimimen oblys ákimi orynbasarlary basqaratyn jedel shtabtar, ár aýdan, qalalarda arnaıy jumys toptary quryldy. Arnaıy jol kartasy ázirlendi. Zertteý jumystaryna 4 625 adam tartyldy.

— Bıyl óńdeý jumystaryna 443 arnaıy tehnıka jumyldyryldy. Onyń ishinde 239 jer ústi búrikkish tehnıka, 100 gazogenerator, 24 jeńil ushaq, 31 asa jeńil ushaq jáne óziniń joǵary tıimdiligin kórsetken 49 agrodron bar. Bıologııalyq tıimdiligi joǵary pestıtsıdter qoldanyldy. Sonymen qatar, shegirtke máselesi boıynsha azamattardyń ótinishterin jedel qarastyrý úshin arnaıy koll-ortalyǵy men telegramm-bot kanaly jumys istedi, — dedi komıtet tóraǵasynyń orynbasary.

Saıat Saqmoldın Reseı, Qyrǵyzstan, Ózbekstan, Qytaı memleketterimen eki jaqty kelisimder aıasynda shegirtke tektes zııankesterge qarsy qorǵaý sharalaryn júrgizý boıynsha birlesken zertteýler, onlaın-keńester jáne shegirtkeniń taralýy jóninde aqparat almasý júıeli túrde júrgizilip otyrdy.

— Júrgizilgen sharalardyń nátıjesinde aýyl sharýashylyǵy daqyldarynyń zaqymdanýyna jáne shegirtkelerdiń kórshiles memleketterdiń shekaralas aýmaqtaryna qonys aýdarýyna nemese ushyp kelýine jol berilmedi. Respýblıka aýmaǵynda egistik alqaptaryna, jaıylymdar men shabyndyqtarǵa shegirtkeden zııan kelgen joq. Bıyl jyly shegirtke tektes zııankesterge qarsy kúres naýqany sátti aıaqtaldy dep aıtýǵa bolady, — dedi ol.

Aıta ketelik mınıstrlik shegirtkeniń kesiri egin shyǵymyna áser etpeıtinin aıtqan edi.