Shegirtke shekara bilmeıdi: Batys Qazaqstandaǵy jaǵdaı qalaı
ORAL. KAZINFORM — Batys Qazaqstan oblysynda shegirtkege qarsy hımııalyq óńdeý jumystary júrgizilip jatyr.
AShM Agroónerkásiptik keshendegi memlekettik ınspektsııa komıteti BQO aýmaqtyq ınspektsııasynyń basshysy Erlan Orynbaevtyń Kazinform tilshisine málim etkenindeı, bıyl úıirli shegirtkelerge qarsy 134,5 myń gektar aýmaqty ýlaý josparlanǵan edi.
Erlan Qulataıulynyń sózine qaraǵanda, osy maqsatqa respýblıkalyq bıýdjetten 312 mln teńge bólindi. Hımııalyq óńdeý jumystary 21 mamyrda bastalǵan.
— Qazirdiń ózinde bul jumys artyǵymen oryndalyp, 177 myń gektar jer óńdeldi. Oblystyń barlyq aýdanynda 5 aerozoldi generator, 14 jeldetkish búrikkish, 2 jeńil ushaq, 3 dron jumys istep jatyr. Sonymen qatar 192,3 myń gektarǵa saıaq shegirtkelerge qarsy ýlaý jumysyn júrgizýge oblystyq bıýdjetten 726 mln teńge qarastyryldy. Buǵan 16 tehnıka tartyldy, — deıdi Erlan Orynbaev.
Onyń aıtýynsha, ıtalııalyq prýstyń dernásilderi ár 10-12 jyl saıyn jappaı jandanyp otyrady. Mysaly, 2000 jyly Batys Qazaqstan oblysy aýmaǵynda 800 myń gektar jer óńdeldi. Mundaı jaǵdaı 2012-2013 jyly qaıtalandy. Endi sol tsıkl bıylǵy jylǵa kelip tur.
— Jýyrda Qaratóbe aýdany Hankól eldi mekeni turǵyndarynan shegirtkeniń qaptap ketkeni jóninde habar tústi. Qazirgi tańda ondaǵy jer tolyqtaı óńdeldi. Kúni búgin ıtalııalyq prýs pen saıaq shegirtkeler aralasyp ketken deýge bolady. Shegirtkege qarsy ýlaý jumystary aldaǵy shilde aıynyń alǵashqy onkúndiginde aıaqtalady. Hımııalyq óńdeý jumystarynyń bıologııalyq tıimdiligi 90-92 paıyz. Sondyqtan shegirtkeni túgel joıyp jiberý múmkin emes. Zerttelmegen jerlerden shyǵýy yqtımal, — deıdi ınspektsııa basshysy.
Onyń málimdeýinshe, shegirtkeden zardap shekkeni jóninde fermerlerden aryz-shaǵym túsken joq.
— Shegirtkeniń el men jerdi tańdamaıtyny túsinikti. Sol sebepti Reseıdiń kórshiles aýmaqtaryndaǵy mamandarmen de baılanystamyz. Shekaralas aımaqtarǵa baryp, pikirlesip turamyz. Basty maqsat — shegirtkege tosqaýyl qoıý, — dedi Erlan Orynbaev.
Inspektsııa málimeti boıynsha ótken jyly respýblıkalyq bıýdjet esebinen 113,5 myń gektar jerde hımııalyq óńdeý jumystary júrgizilgen bolatyn.
Eske sala keteıik, budan buryn Qyzylorda oblysynda shegirtkeler jyldaǵydan eki apta erte oıanǵanyn jazǵan edik.