Shegirtkeniń taralýyn aldyn alý baǵytynda bıyl erterek qımyldadyq - Agroónerkásip keshenindegi memlekettik ınspektsııasy komıteti
ASTANA. 28 mamyr. QazAqparat - Bıylǵy jyly shegirtkeniń taralýy shamamen 3 mln. gektar aýmaqta boljanyp otyr. Bul týraly búgin QR Aýyl sharýashylyǵy mınıstrliginde ótken baspasóz máslıhatynda belgili boldy.
«Ótken jyly qurǵaqshylyqqa baılanysty shegirkeniń jaǵdaıy birshama qıyndaý boldy. Ásirese, bul Reseımen shekaralas ornalasqan elimizdiń oblystarynda baıqaldy. Atap aıtqanda, kórshiles eldiń aýmaǵynan biraz shegirkeniń bizge qaraı ushqanyna kózimiz jetti. Sondyqtan osyndaı ahýaldy eskere otyryp, bıyl erterek qımyldap, birqatar jumystardy júzege asyrdyq»,-dedi QR Aýyl sharýashylyǵy mınıstrliginiń agroónerkásip kesheni boıynsha Memlekettik ınspektsııasy komıtetiniń tóraǵasy Saqtash Hasenov.
Belgili bolǵandaı, bıylǵy jyly úıirli shegirtkeniń taralýy shamamen 3 mln. gektar aýmaqta boljanǵan.
Búgingi tańda oblystarǵa 2 mln. gektardan astam aýmaqqa jeterlik ınsektıtsıdter jetkizildi (Aqtóbe, Almaty, Atyraý, Shyǵys Qazaqstan, Jambyl, Batys Qazaqstan, Qyzylorda, Mańǵystaý, Soltústik Qazaqstan jáne Ońtústik Qazaqstan oblystary).
Pestıtsıdterdi satyp alýǵa jáne hımııalyq óńdeý jumystaryn ótkizýge respýblıkalyq bıýdjetten 1,8 mlrd. teńge bólingen kórinedi.
Taratylǵan málimetterge qaraǵanda, shegirtke zııankesteriniń damýy men taralýy ár 10 jyl saıyn tsıkldy aınalymǵa ıe. Shegirtkelerdiń sońǵy ret jappaı taralýy 2000 jyly 8 mln. gektar jerde boldy. Al keıingi jyldary shegirtke zııankesteriniń taralǵan aýmaqtary 2004 jyly 505,4 myń gektar aýmaqqa deıin kemigen. Alaıda 2005 jyldan beri taralý aımaǵy birtindep kóbeıip barady.
