Shegirtkege qarsy is-shara sáýir aıynda bastalady - AShM
Elordada shekaralas aýmaqtarda shegirtke tektes zııankestermen jáne basqa da aýyl sharýashylyǵy zııankesterimen kúresý máseleleri boıynsha Qazaqstan jáne Reseı Aýyl sharýashylyǵy mınıstrligi mamandarynyń jyl saıynǵy halyqaralyq keńesi ótti.
«Taraptar 2019 jyly júrgizilgen is-sharalar, shekaralas aýmaqtardaǵy shegirtke zııankesteriniń damýy men taralýy, aýyl sharýashylyǵy zııankesterimen jáne aýrýlarmen kúresý is-sharalar týraly aqparatpen almasty. Sondaı-aq, osy baǵytta ózara is-qımyl men yntymaqtastyq máseleleri talqylandy», delingen habarlamada.
RF delegatsııasyn «Rosselhoztsentr» FMBM dırektory Aleksandra Malko bastap kelgen. Ol 2019 jyly shegirtke tektes zııankesterge qarsy eki eldiń birlesip júrgizgen is-sharalary arqasynda shekaralas aýdandarda aýyl sharýashylyǵy daqyldary egistikteriniń zaqymdanýy, sondaı-aq shegirtkelerdiń kórshi eldiń shekarasyna ótip ketýi bolmaǵandyǵyn atap ótti.
QR Aýyl sharýashylyǵy mınıstrligi Agroónerkásiptik keshendegi memlekettik ınspektsııa komıetiniń tóraǵasy Almabek Mars 2020 jyly josparlanǵan is-sharalar týraly keńinen aıtyp berdi.
Onyń aıtýynsha, 2020 jyly shegirtke tektes zııankester 554 myń gektar alqapta taralýy múmkin dep kútilýde. Shegirtkege qarsy kúres úshin respýblıkalyq bıýdjetten 1 mlrd. teńge bólingen. Atalǵan qarajat barlyq boljamdalǵan alqapqa pestıtsıdterdi jáne hımııalyq óńdeýdi satyp alýǵa múmkindik beredi.
«Ortalyq qoımada jalpy 47,5 myń lıtr pestıtsıd qory bar. 2020 jyly shegirtke tektes zııankesterdiń úıirine qarsy is-sharalar júrgizý úshin 148 arnaıy tehnıka: onyń ishinde 119 jerústi búrikkish, 10 ushaq, 10 jeńil áýe kemesi jáne 9 aerozol generator jumyldyrylady. Búgingi kúni shegirtke tektes zııankesterge qarsy sharany ýaqytyly uıymdastyrý úshin daıyndyq aıaqtalýǵa jaqyn», - dedi A.Mars.
Keńes sońynda Qazaqstan men Reseı mınıstrlikteri 2020 jyly eki eldiń shekaralas aýmaǵynda shegirtke tektes zııankesterdiń taralýyna jol bermeý jónindegi birlesken is-sharalar josparyna qol qoıdy.