«Shegirtke shepti buza almaıdy» -respýblıkalyq basylymdarǵa sholý
***
Keshe Aqordada Memleket basshysy Nursultan Nazarbaevtyń tóraǵalyǵymen Qazaqstannyń 2011 jylǵy áleýmettik-ekonomıkalyq damýynyń mańyzdy máseleleri qaralǵan jumys babyndaǵy keńes bolyp ótti. Osyǵan oraı «Egemen Qazaqstan» gazetinde «Jyldyń jaqsy aıaqtalatynyna úmit mol» degen taqyryppen kólemdi maqala jarııalandy. Keńes barysynda 2011 jyldyń birinshi jartyjyldyǵyndaǵy áleýmettik-ekonomıkalyq damý qorytyndylary jáne aǵymdaǵy jyldyń boljamdary týraly Premer-Mınıstr Kárim Másimov baıandama jasady. «Osy aıdyń basynda biz ekonomıkanyń qorytyndysyn shyǵardyq. Qazaqstan ekonomıkasy 7,1 paıyzǵa ósti. Qýanarlyq bir jáıt, óndiris ósimi 6 paıyzdy qurady. Osy 7 paıyz kórsetkishtiń 2,6 paıyzy ındýstrııalyq baǵdarlamalardyń esebinen qamtamasyz etildi. Indýstrııalyq baǵdarlama bizge osyndaı úlken jetistikter ákelýde. Biz ındýstrııalyq baǵdarlamalardy júzege asyrýdyń jartyjyldyq qorytyndysyn shyǵaryp otyrmyz», - dep atap ótken alqaly jıyndy ashqan Elbasy.
Sońǵy kezderi birqatar buqaralyq aqparat quraldarynda Qazaqstanǵa zııankes shegirtkelerdiń shabýyl qaýpi tónip tur degendeı aqparattar taratylýda. Mundaı jándikter shabýylynyń egistikter men onda ósken astyq jáne basqa daqyldar úshin qansha qaterli ekendigin elimiz osydan biraz jyl buryn jaqsy sezingen bolatyn, ony halyq ta umyta qoıǵan joq. Sondyqtan osy máseleniń mán-jaıyn jáne atalǵan iste qandaı jumystardyń júrgizilip jatqandyǵyn bilmek bolǵan «Egemen Qazaqstan» gazeti Agroónerkásiptik keshendegi memlekettik ınspektsııalar komıteti tóraǵasynyń orynbasary Muhtar Álıevti áńgimege tartqan. Suhbat «Shegirtke shepti buza almaıdy» degen taqyryppen berilgen.
***
«Alash aınasy» gazetiniń jazýynsha, keshe QR Kólik jáne kommýnıkatsııa mınıstrligi kelesi aıdan bastap elimizdegi tehnıkalyq baqylaý qyzmetiniń jekemenshik ortalyqtarǵa beriletindigin málimdedi. Bul ǵana emes, kóliktik baqylaý salasyndaǵy ruqsat berý qujattary da eki ese azaıady. Al Tatarstandaǵy «Býlgarııa» teplohodynyń apatynan keıin sý kemelerin tekserý jumystary kúsheıtilip, birqatar jolaýshy tasymaldaıtyn kemeler qyzmetine tyıym salynǵan. Sondaı-aq aldaǵy ýaqytta kóliktik baqylaý organdary beretin 36 ruqsat qujatynyń 14-i qysqartylýy múmkin. Bul jaıynda tereńirek basylymnyń juma kúngi nómirindegi «Mınıstrlik mindetterin qysqartyp jatyr» degen taqyryppen berilgen maqaladan bile alasyzdar.
Reseı eli syrany alkogoldi ónimderdiń qataryna teńestirip, «alkogoldi ónimderge qoıylatyn shekteýlerdiń barlyǵy syraǵa da qatysty bolýy kerek» dep arnaıy zań qabyldady. Osyǵan oraı «Alash aınasy» gazetiniń dástúrli «Oı-kókpar» aıdarynda «Reseıdegideı syrany alkogol ónimderine teńestirip, oǵan shekteýler qoıý kerek pe?» degen saýal mamandar talqysyna túsken. «Salaýatty ómir saltyn qalyptastyrý problemalary» ulttyq ortalyǵynyń bas dırektory Sáýle Dıqanbaeva: «Mindetti túrde, jappaı syra ataýlynyń barlyǵyna alkogoldi ónimdermen teńestirip, alkogoldi ónimderge saı shekteýler qoıý kerek», dese, buǵan túbegeıli qarsy shyqqan Alkogol ónimderin óndirýshiler men satýshylar qaýymdastyǵynyń prezıdenti Ámirjan Qalıev: «Quramynda alkogoldiń quramy 0,5 paıyzdan tómen syralar «alkogolsiz ónim» dep jazylǵan. Endeshe, biz oǵan qalaısha tyıym salamyz?», - deıdi.
***
«Atyraý qalalyq prokýratýrasymen jarylǵysh zattar men pırotehnıkalyq buıymdardy óndirýshi, alýshy jáne ótkizý qyzmetimen shuǵyldanatyn zańdy tulǵalardyń jarylǵysh zattardy saqtaý tártibin tekserý kezinde jeke seriktestikke qaraıtyn qoımadan paıdalaný merzimi aıaqtalǵan 40 tonna jarylǵysh zat tabyldy», - dep jazady «Aıqyn» gazeti. Basylymnyń atap ótýinshe, qoımadan tabylǵan jarylǵysh zattar zaýyttan 2007-2008 jyldary shyqqan. Qazirgi kúni mamandar bul qaýipti zattardy aldyn ala synaqtan ótkizbeıinshe paıdalanýǵa bolmaıdy degen toqtamǵa kelip otyr. Maqala «Qyryq tonna jarylǵysh zat tabyldy» degen taqyryppen berilgen.
«Aıqyn» gazetiniń jazýynsha, Semeı qalasynyń polıtsııasy bankomatty buzyp, 5 112 000 teńgeni kóterip ketkenderge izdeý jarııalady. Semeı qalasyndaǵy Áýezov kóshesine ornalasqan ortalyq dárihanalardyń birine keshtetip kirgen 20-25 shamasyndaǵy úsh jigit dári satýshy farmatsevtke qubyr jóndeıtin avarııalyq qyzmettiń santehnıkteri ekendikterin aıtyp, ishke ótken. Esikti ashqan farmatsevt-áıeldi qoımaǵa arnalǵan bólmelerdiń birine qamap tastaǵan «santehnıkter», dánekerleý apparatynyń kómegimen aptekanyń kireberisinde turǵan bankomatty buzyp, 20 mınýttyń ishinde izderin sýytqan.
***
«Keshe Memleket basshysy Nursultan Nazarbaev Ózbekstan Respýblıkasynyń Prezıdenti Islam Karımovpen telefon arqyly sóılesti», - dep jazady «Kazahstanskaıa pravda» gazeti. Basylymnyń jazýynsha, áńgime barysynda Memleket basshysy Ózbekstanda bolǵan jer silkinisi kezindegi oryn alǵan adam shyǵyndaryna baılanysty kóńil aıtty. Nursultan Nazarbaev zardap shekkenderdiń týǵan-týysqandary men jaqyndaryna óziniń qoldaý sózderin jetkizdi. Memleket basshysy Qazaqstan jer silkinisi zardaptaryn joıýǵa qoldaý kórsetýge daıyn ekendigin de tilge tıek etti. Sonymen qatar Nursultan Nazarbaev pen Islam Karımov Qazaqstan men Ózbekstan yntymaqtastyǵynyń odan ári damýynyń keń aýqymdy máselelerin talqyǵa saldy.
