Shegirtke 1,5 mlrd teńgeni «jep qoıdy»
ASTANA. QazAqparat - QR Aýyl sharýashylyǵy mınıstrligine qarasty agroónerkásiptik kesheni salasyndaǵy memlekettik ınspektsııanyń basshysy Erjan Aınabekovtyń aıtýynsha, bıyl shegirtke tarapynan eshqandaı qaýip joq. Júıeli jumystardyń nátıjesinde atalǵan zııankester taraǵan alqaptar azaıyp keledi, dep habarlaıdy QazAqparat tilshisi.
Búginde elimizde shegirtkeniń birneshe túri bar. Máselen, morokkolyq shegirtke Ońtústik Qazaqstan men Jambyl oblystarynda taralsa, Almaty, Qyzylorda, Batys Qazaqstan, Atyraý men Shyǵys Qazaqstanda azııalyq shekirtke jıi kezdesedi. Al ıtalıandyq prýs elimizdiń barlyq óńirlerinde ishinara kezedesedi. Degenmen, olar Qostanaı, Aqtóbe, Qaraǵandy oblystary men soltústik aımaqtarda keńinen taraǵan. "Bıyl úıirli shegirtkege qarsy sharalarǵa 1,5 mlrd teńge qarastyrylǵan. Barlyq konkýrstyq sharalar ýaqytynda oryndaldy. Aldyn alý sharasy aıasynda barlyq aımaqtarda zertteý jumystary júrgizilip, qajeti pestıtsıdter satyp alyndy. Osy ýaqytqa deıin Ońtústik Qazaqstan oblysynda barlyq jumystar atqaryldy. Jambyl oblysynda júrgizilip jatqan jumystar aıaqtalýǵa jaqyn. 24-25 mamyrda Qyzylorda oblysy tıisti sharalarǵa kirisedi. Odan keıin Almaty men soltústik aımaqtarda jumys jalǵasatyn bolady. Atalǵan másele boıynsha qazir eshqandaı qaýip joq. Barlyq jumystar oıdaǵydaı atqarylýda", - deıdi E. Aınabekov.
Inspektsııa basshysynyń sózine qaraǵanda, buryn shegirtke zııankesteri 4,7 mln gektardy jaıpap ótse, sońǵy jyldary ol kórsetkish 1,5 mln gektarǵa deıin azaıdy. Júıeli jumystardyń nátıjesinde ondaı alqaptar áli de azaıa túsetin bolady.
