Shegeni baılap, girdi tisimen kóteretin aqtóbelik jigitter jattyǵý zalyna muqtaj
AQTÓBE. QazAqparat - Aqtóbeniń Mártók aýdanynda mektep muǵalimi kúshtik sport túrin damytyp júr. Áýesqoı sportshylar shegeni baılap, armatýra maıystyryp, tisimen salmaǵy 100 keli bolatyn adamdy kóterip júr, dep habarlaıdy QazAqparat tilshisi.
Aqtóbeniń Mártók aýdanynda turatyn Anton Polegonko men onyń shákirtteri kórermenin tańqaldyryp júr. Aýdandaǵy №1 orta mekteptiń dene shynyqtyrý pániniń muǵalimi shege maıystyrady, áınek úgindisiniń ústinde turyp jattyǵý jasap, kirpish syndyrady, 40 jolaýshysy bar avtobýsty tartady. Kúsh ıesi sońǵy jyldary ekstremaldy qoıylymdaryn oblys ortalyǵynda kórsetip júr.
«Bir jyldan beri shoý baǵdarlamalardy kórsetip júrmiz. Jastar qyzyǵady, shydamdysy óz kúshin synaıdy. Bul qoıylymdardy kórsetý úshin tabandylyq kerek. Kez kelgen adam alyp kúsh ıesi bola alady. Biraq bireýi 1-2 jyl aralyǵynda meńgerip alsa, keıbiri 10 jyl ýaqytyn sarp etedi. Shákirtim Rýslan Ábilhanov 6 jyldan beri jattyǵady. Negizi gir, ziltemir kóterý, paýerlıftıng, armlıftıngpen aınalysatyn adamdardyń múmkindigi mol»,- dedi sportshy Anton Polegonko.
Sportshy kúshti qajet etetin kórsetilimderdi alǵashqyda gazetten kórip, qıyndysyn jınaǵan. Keıin ınternet arqyly arnaıy túsirilgen beınematerıaldardy qarap, tájirıbe jınady. Táýekelge kóp barady. Jaraqat alady, keıde uzaq emdeledi.
«Maǵan kirpish syndyrǵan jáne 40 jolaýshysy bar avtobýsty tartý unaıdy. Bul kórsetilimderdi iske asyrý qıyn. Keıde jaraqat alamyz, jaranyń izi qalady. Adamdar bizdiń múmkindigimizge qarap qyzyǵady, ishten tynyp otyrady. Jabyq keshterge shaqyrtý alǵan joqpyz. Biraq usynys tússe, qarsy bolmaımyz. Kúshtik ekstrım qyzyq ári shyǵyn. Biz ózimizge qajetti shege, armatýra, tapa sekildi qajetti zattardy únemi satyp alamyz. Shegeni baılaýǵa 30-50 sekýnd jetkilikti»,- dedi sportshy.
Anton Polegonkonyń aıtýynsha, tabıǵı ónimmen tamaqtanyp, qarapaıym úı sharýashylyǵynda jumys istegen adam úshin kúshtik ekstrımniń esh qıyndyǵy joq eken. Ol qazirgi kúni tisimen 70-100 keli bolatyn adamdy kóterip, bir qolymen skovorodkany maıystyra alady. Armatýrany moıynymen maıystyryp, shege baılaıdy. Aldaǵy ýaqytta shynjyrdy úzý sheberligin meńgerýdi josparlap júr. 
«Aýdanda arnaıy mektebimiz, jattyǵý ornymyz joq. Qazirgi ýaqytta mektepte bir bólme berildi. Bul sport túrin 50 jigit meńgergisi keledi. Al jattyǵý bólmesi bar bolǵany 20 adamǵa arnalǵan. Jattyǵýǵa arnalǵan qural-jabdyqtardyń bári ózimdiki, keıbirin shákirtterip ákelip, ornatyp qoıdy»,- dedi A.Polegonko.
