Sheberler marketpleısi: Qolóner buıymdaryn satatyn tsıfrlyq platforma tanystyryldy
ASTANA. KAZINFORM — Endi qazaqtyń qolóner buıymdaryn bir jerden tańdap, eldiń kez kelgen óńirine tapsyryspen aldyrýǵa bolady. Astanada otandyq sheberlerdiń ónimderin satýǵa arnalǵan «Sheber» tsıfrlyq platformasy tanystyryldy. Jańa joba qolónershilerge keń naryqqa shyǵýǵa, al satyp alýshylarǵa — ulttyq naqyshtaǵy tól týyndylardy alypsatar kómeginsiz ońaı tabýǵa múmkindik beredi.
Joba «Atameken» ulttyq kásipkerler palatasynyń qoldaýymen júzege asyp jatyr. Bastama Prezıdent Qasym-Jomart Toqaevtyń shaǵyn jáne orta bıznesti, sonyń ishinde óńirler men aýyldyq jerlerdegi kásipkerlikti damytý jónindegi tapsyrmalaryn iske asyrý aıasynda qolǵa alynǵan.
Tanystyrylymda sóz sóılegen QR Prezıdentiniń Ákimshiligi Basshysynyń orynbasary Ásel Janasova qolónershiler eńbeginiń qoǵamda laıyqty baǵalanýy men olardyń kásibin damytýǵa naqty ekonomıkalyq múmkindikter jasaýdyń mańyzdylyǵyn atap ótti.
— Memleket basshysy óz Joldaýynda: «Adal ári qajyrly eńbegimen tabysqa jetken adamdar árdaıym qurmetke bólenip, eńbegi laıyqty baǵalanýǵa tıis», — dep atap ótken bolatyn. Memleket eńbek adamyn júıeli túrde qoldap, onyń kásibı sheberligin shyńdaýyna jáne óz isin damytýyna jaǵdaı jasap keledi. Búgingi is-shara men SHEBER platformasynyń iske qosylýy — osy memlekettik saıasattyń is júzindegi taǵy bir kórinisi. Qazaqstannyń ár óńirinde talantty qolónershiler bar. Olardyń jasaǵan buıymdary kópshiliktiń qurmeti men joǵary baǵasyna ábden laıyq. Endigi mindetimiz — olarǵa óz satyp alýshylaryn tabýǵa kómektesý, turaqty tapsyrystar alýyna jaǵdaı jasaý jáne óndiris kólemin keńeıtýge múmkindik berý, — dep atap ótti Ásel Janasova.
Qolónershilerge jańa naryq
«Sheber» platformasynyń basty maqsaty — elimizdegi qolóner sheberleri men olardyń ónimderin keń aýdıtorııaǵa tanystyrý. «Atameken» ulttyq kásipkerler palatasynyń tóralqa tóraǵasy Qanat Sharlapaevtyń aıtýynsha, sheberler aldyndaǵy basty kederginiń biri — iri qalalarda naryq tabý.
— Óńirlerge jasaǵan saparlarymda sapaly ári ózindik ereksheligi bar ónimder shyǵaratyn, óndiris kólemin keńeıtýge daıyn sheberlermen kezdesemin. Olardyń basty suranysy — ótkizý naryqtaryna qol jetkizý. Sheberhananyń turaqty bızneske aınalýy úshin turaqty tapsyrystar, jolǵa qoıylǵan logıstıka jáne saýda jelilerine shyǵý múmkindigi qajet. Biz SHEBER baǵdarlamasy arqyly dál osyndaı júıeni qalyptastyrýdy kózdep otyrmyz, — dep jetkizdi Qanat Sharlapaev tilshilerge bergen suhbatynda.
Zamanaýı tilmen aıtqanda, bul marketpleıs. Biraq ol tek qazaqstandyq sheberlerdiń dástúrli qolóner buıymdaryn ilgeriletýge arnalǵan. Munda bylǵarydan, keramıkadan, sazdan jasalǵan jáne basqa da qolóner týyndylary usynylady.
Sheberlermen jumys isteý úshin «Atameken» Qazaqstannyń barlyq 20 óńirindegi kásipkerler palatalarynyń jelisin iske qosady. Baǵdarlamanyń negizine eki myńnan astam kásipkerdi biriktirgen «Bir aýyl — bir ónim» jobasynyń tájirıbesi de alynady. SHEBER osy jumysty keńeıtip, jergilikti bastamalardy ulttyq aýqymdaǵy saýda ınfraqurylymymen baılanystyrady.
Sheberlerden komıssııa alynbaıdy
Jobanyń mańyzdy erekshelikteriniń biri — sheberler úshin ónimderin ornalastyrý tegin. Platformada satylǵan taýardan komıssııa ustalmaıdy, al tólem satýshynyń tikeleı esepshotyna túsedi.
Ázirleýshiler málimetinshe, qazirgi ýaqytta platformaǵa 100-den astam qolónershi tirkelgen. Degenmen elimizdegi sheberlerdiń naqty sany budan áldeqaıda kóp.
Jobany uıymdastyrýshylardyń aıtýynsha, resmı kásipker retinde tirkelmegen, ónimderin kóbine qolma-qol aqshaǵa satatyn sheberler de bar.
— Osy turǵydan alǵanda, «Sheber» tek saýda alańy emes, qolóner salasyndaǵy kásipkerlikti ashyq júrgizýge yntalandyratyn qural retinde qarastyrylyp otyr. Tsıfrlyq format sheberlerge óz ónimderin júıeli túrde satýǵa, tutynýshylarmen baılanys ornatýǵa jáne kásibin damytýǵa jaǵdaı jasaıdy, — dedi mobıldi qosymshany ázirleýshi maman Nadjıbýlla Ǵabıbýllauly.
Ónimderdi satý marketpleıster, bólshek saýda jelileri, áýejaılar, mýzeıler men týrıstik nysandar arqyly damytylady dep josparlanýda. Baıqaý negizinde irikteý jáne bıznes ókilderiniń aldyn ala tapsyrystary óndirýshilerge suranysty dálirek baǵalaýǵa, materıaldar satyp alýdy jáne óndiris kólemin josparlaýǵa múmkindik beredi.
JI sheberlerdiń jumysyn jeńildetedi
Platformany ázirleýshiler qolónershilerge ónimderin ornalastyrýdy barynsha jeńildetýge tyrysqan. IT-maman N. Ǵabıbýllaulynyń aıtýynsha, «Etsy» sekildi basqa da sheteldik marketpleısterge shyǵatyn fýnktsıonaldar paıda bolyp jatyr.
— Sheberlerge yńǵaıly bolýy úshin jeke kabınet ázirledik. Jasandy ıntellektiniń kómegimen taýardyń sıpattamasyn daıyndap, sýret-vıdeony óńdep, qajetti tegterdi qosýǵa bolady, — dedi ol.
Platformanyń basty betinen de qajetti buıymdy izdeý jeńildetilgen. Máselen, «Ákege syılyq», «Anaǵa syılyq» nemese «Shetelden kelgen qonaqqa syılyq» sekildi toptamalar ázirlenip, adam ózi izdegen ónimdi tańdaı alady. Bul ulttyq naqyshtaǵy buıymdardy tek kúndelikti tutyný zaty retinde emes, erekshe syılyq retinde de usynýǵa múmkindik beredi.
Tapsyrys Qazaqstannyń kez kelgen óńirine jetkiziledi
Platformada taýardy tólem kartasy arqyly satyp alýǵa bolady. Jetkizý qyzmetine «Qazposhta» men Yandex jetkizý qyzmeti tartylǵan. Bul ásirese iri qalalardan shalǵaı ornalasqan aýyldardaǵy sheberler úshin mańyzdy.
Q. Sharlapaevtyń aıtýynsha, jetkizý qyzmetiniń qoljetimdi bolýy — jobanyń negizgi sharttarynyń biri bolǵan. «Qazposhtanyń» eldi mekenderdegi bólimsheleri arqyly qolónershiler ónimderin barlyq óńirge jetkizý múmkindigi qarastyrylǵan.
Jobany iske asyrýǵa bankter men iri bıznes ókilderi de demeýshilik kórsetken. Aldaǵy ýaqytta platformanyń múmkindikterin keńeıtip, qazaqstandyq qolóner buıymdaryn halyqaralyq saýda alańdaryna shyǵarýǵa jaǵdaı jasaý kózdelip otyr.
Eske sala ketsek, «Ulttyq qolóner mektebi» jobasynyń beınesabaqtary YouTube jelisinde jarııalandy.
Astanada ashylǵan «Eń ádemi kıim — ulttyq kıim» kórmesinde XIX ǵasyrdan jetken jádigerler men tarıhı úlgide tigilgen jańa týyndylar kópshilikke usynyldy.
