Shaımardan Nurymov: Qazaqstandyqtardyń maqsaty men armany bir

ASTANA. QazAqparat - 28 sáýirde ótetin Qazaqstan halqy Assambleıasynyń jıyrma altynshy sessııasy Prezıdent Nursultan Nazarbaevtyń ókimimen «Bes áleýmettik bastama - qoǵamnyń áleýmettik birliginiń tuǵyry» kún tártibimen shaqyrylyp otyr. Demek, halyqtyń áleýmettik jaǵdaıyn arqaý etken sessııanyń bul jolǵy mańyzy da erekshe bolmaq. Osy rette QazAqparat tilshisi QR Parlamenti Májilisiniń depýtaty, Qazaqstan uıǵyrlary etnomádenı ortalyǵynyń tóraǵasy Shaımardan Nurymovty sózge tartyp, aıtýly shara jaıly pikirin bilgen edi.

«El Prezıdenti Nursultan Nazarbaevtyń ókimimen Qazaqstan halqy Assambleıasynyń jıyrma altynshy sessııasy «Bes áleýmettik bastama - qoǵamnyń áleýmettik birliginiń tuǵyry» kún tártibimen shaqyryldy. Bul bes áleýmettik bastama tek qazaqstandyqtardy emes, sheteldi de dúr etkizgenin kórdim. Mysaly, jaqynda ǵana biz parlamenttik kezdesýmen Chehııada boldyq. Chehııanyń depýtattary Memleket basshysynyń bul áleýmettik bastamalaryna tań qalǵanyn jasyrmaı otyr. Sheteldik áriptesterimiz «Dúnıejúzilik aýqymda ekonomıkalyq daǵdarys bolyp jatqan kezde Prezıdent Nursultan Nazarbaevtyń osynshalyqty áleýmettik baǵyttaǵy jeńildikter men múmkindikterdi berip otyrǵany - eń aldymen óz halqyna degen mahabbatyn kórsetetinin» tilge tıek etedi. Men sheteldik depýattardyń aıtqanyn sózbe-sóz keltirip otyrmyn», - deıdi Shaımardan Nurymov.

Onyń aıtýynsha, osynaý kezeńde jarııalanǵan bes áleýmettik bastama Elbasynyń júreginiń keńdigin pash etti.

«Bul - chehııalyqtardyń Prezıdenttiń jumysyna bergen baǵasy. Shyn máninde, árbir bastama halyqtyń áleýmettik jaǵdaıyn jaqsartýǵa baǵyttalǵan. Stýdentterge arnap, qosymsha 20 myń grant berilmek. Demek, burynǵy 50 myń grant 70 myń grantqa deıin ósti. Bul óte joǵary kórsetkish. Bunymen shektelip qalmaı, eń aldymen stýdentterdiń baspanasy - jataqhana qurylysy da umyt qalǵan joq. Ózińiz biletindeı, 4 jyldyń ishinde 75 myń stýdentke jataqhana salynǵaly jatyr. Ol jataqhanalar úshin myńdaǵan jumys oryn ashylatynyn eskere berińiz. Mıllıondaǵan kirpishtiń, júzdegen tehnıkalardyń jumyldyrylýynyń arqasynda jumys oryndary kóptep ashylady», - deıdi májilismen.

Shaımardan Nurymov Assambleıanyń bul jolǵy sessııasynda bes áleýmettik bastamany júzege asyrýdyń joldary tereńirek qaýzalatynyna senim bildirdi.

«Men ózim depýtattyqpen qatar, ózińiz de biletindeı, QHA keńesiniń múshesi, sonymen qatar Qazaqstan uıǵyrlarynyń tóraǵasymyn. Uıǵyr etnomádenı ortalyǵynyń tóraǵasy retinde aıtarym, Qazaqstandaǵy uıǵyrlardyń pikiri de - osy. Buryn da BAQ-qa aıtyp júrgenimdeı, qazaq jerinde Qazaqstan máńgilik bolatyn bolsa, ol Qazaqstan uıǵyrlarynyń tili de, mádenıeti de, ózi de máńgilik bolady degen sóz. Sebebi, múdde bir. Qazaqstandyq uıǵyrlar aldymyzǵa qoıǵan tapsyrmalardy júzege asyrýda septigin qosyp kelgen, aldaǵy ýaqytta da qosa beretin bolady. Óıtkeni, aldymyzǵa qoıǵan maqsat, talap, arman - bir. Maqsatymyz da, keleshegimiz de bir. Mine, osy jaıynda Qazaqstan halqy Assambleıasynyń 26-shy sessııasynda aıtylady», - dedi Shaımardan Nurymov.