Shaımardan Nurymov: Assambleıanyń mańyzdy mindeti - etnosaralyq kelisimdi qoldaý
«Tuńǵysh Prezıdentimiz - Elbasy Nursultan Ábishuly Nazarbaev Qazaqstan halqy Assambleıasyn qurý ıdeıasynyń avtory ekeni belgili. Mundaı uıym álemde alǵash ret Qazaqstanda quryldy. Biz shetelge shyǵyp turamyz jáne sońǵy ýaqytta barlyq jerde Assambleıa elimizdegi etnosaralyq beıbitshilik pen kelisimdi saqtaýǵa úlken úles qosatyndyǵy aıtylady. Máselen, Qytaı Halyq Respýblıkasynda bolyp, Ulttar komıtetine barǵanymyzda ózderiniń Qazaqstan halqy Assambleıasynyń tájirıbesin zerdelegenin jáne ony jumysta qoldanatynyn aıtty. Qazaqstanǵa kelgenderdiń barlyǵy da 100-den astam etnos ókilderiniń bir halyqtaı beıbit ómir súrip jatqanyna tań qalady. Elimizdegi ahýalmen tanysqandardyń barlyǵy da munyń Tuńǵysh Prezıdent Nursultan Nazarbaevtyń sarabdal syrtqy saıasatynyń arqasynda oryn alyp otyrǵanyn atap ótedi», - deıdi Shaımardan Nurymov.
Ol 29 sáýirge belgilengen QHA Assambleıasynyń kezekti sessııasy Tuńǵysh Prezıdent ókilettigin toqtatqannan keıin birinshi ret ótetinin aıtyp, onyń barysyndaǵy negizgi mindetterge toqtaldy. Onyń atap ótýinshe, aldaǵy sessııa barysynda Elbasynyń Qazaqstan halqyna arnaǵan Joldaýlarynda, baǵdarlamalarynda atalǵan barlyq tapsyrmalardy oryndaýǵa qatysty máselelerdi talqylaý qajet. Sebebi Tuńǵysh Prezıdenttiń barlyq tapsyrmalary halyqtyń ál-aýqatyn arttyrýǵa, memlekettilikti nyǵaıtýǵa baǵyttalǵan. Bul rette Nursultan Nazarbaev Qazaqstannyń basty baılyǵy altyn, munaı jáne ózge de tabıǵı paıdaly qazbalar emes qoǵamdaǵy beıbitshilik pen kelisim dep sanaǵanyn esten shyǵarmaǵan abzal. Osyǵan oraı Assambleıanyń mańyzdy mindeti - etnosaralyq kelisimdi qoldaý, sonymen qatar ósip kele jatqan urpaqty patrıotızmge tárbıleý bolyp qala beredi.
«Árbir qazaqstandyq Qazaqstan ekonomıkasynyń, mádenıetiniń odan ary damýyna óz úlesin qosyp, jańa jaǵdaılardy eskere kele eline qyzmet etýi tıis», - deıdi «Qazaqstan uıǵyrlarynyń respýblıkalyq etnomádenı ortalyǵy» qoǵamdyq birlestiginiń tóraǵasy.
