Shaıdorov shaǵymy: Almaty ákimdigi mánerlep syrǵanaýshylarǵa jaǵdaı jasamaq

ALMATY. KAZINFORM — Almaty ákimdigi qaladaǵy sporttyq nysandardy damytý jumysy týraly habar berdi.

Mánerlep syrǵanaýdan álem birinshiliginiń kúmis júldegeri, Almaty týmasy Mıhaıl Shaıdorov birneshe suhbatynda elimizdiń ońtústik astanasynda jarystarǵa daıyndyq úshin tıisti jaǵdaı joq ekenin aıtty.

Almaty ákimdigi 2024 jyldan bastap iri sporttyq nysandardy qalanyń menshigine qaıtarý jumystary bastalǵanyn málimdedi. Atap aıtqanda, byltyr «Almaty Arena» jáne «Halyk Arena» kópfýnktsıonaldy keshenderi kommýnaldyq menshikke ótti. 

— Nysandar berilgennen keıin olardyń paıdalanylýyna keshendi aýdıt júrgizildi. Qazirgi ýaqytta muz ýaqytyn bólý júıesi kásibı sportshylarǵa, onyń ishinde Mıhaıl Shaıdorovqa, sport mektepteriniń tárbıelenýshilerine, sektsııalar men ulttyq qurama múshelerine basymdyq beretindeı etip retteldi. Mundaı tásil eldiń bolashaq chempıondaryn tárbıeleýge septigin tıgizedi, — dep habarlady ákimdikten.

Odan bólek Mıhaıl Shaıdorov halyqaralyq jıyndar men jarystar arasynda Almatyda júrgen ýaqytynda «Halyk Arena» bazasynda jeke jattyǵý ótkizý múmkindigimen qamtamasyz etý týraly sheshim qabyldanǵan.

— Sońǵy úsh jylda qalada alty jańa dene shynyqtyrý-saýyqtyrý kesheni salyndy, al bıyl taǵy tórt keshenniń qurylysy bastalady. Bul sharalardyń barlyǵy Almatyda buqaralyq jáne kásibı sportty júıeli damytýǵa baǵyttalǵan, — dep habarlady ákimdikten.

Eske salaıyq, Almaty ákimdigi Mıhaıl Shaıdorovqa 2,5 mln teńgeniń sertıfıkatyn tabystady. 

Buǵan deıin memleketke qaıtarylǵan «Almaty arena» men «Halyq arenada» qandaı ózgeris bolatynyn jazǵanbyz.

Sondaı-aq «Medeý» muz aıdynyna 2025-2027 jyldary aralyǵynda rekonstrýktsııa júrgiziletinin jazǵan edik.