Shaıbaly hokkeıden Qazaqstan quramasy Ońtústik Koreıany jeńdi

ASTANA. QazAqparat - Shaıbaly hokkeıden álem chempıonaty qarsańynda Qazaqstan quramasy Ońtústik Koreıamen joldastyq kezdesý ótkizdi, dep habarlaıdy QazAqparat tilshisi.

Kezdesý barysynda qazaqstandyq hokkeıshiler basymdyq tanytty. Oıyn tizginin óz qolynda ustaýǵa tyrysty. Koreıalyq hokkeıshiler dóreki qımylymen birneshe márte muzaıdynnan qýyldy.

Oıynnyń 2-mınýtynda qazaqstandyq Roman Starchenko esep ashsa, odan keıin Tamerlan Gaıtamırov 31, Arkadıı Shestakov 34-mınýtta esepti ústemeleı tústi.

Al 51-mınýtta qazaqstandyq Dmıtrıı Grents, 59-mınýtta Kırıll Polohov kózdegen nysanadan múlt ketken joq.

Osylaısha el quramasy qarsylasynan 5:0 esebimen basym tústi.

Eki qurama buǵan deıin alty márte kezdesti. Onyń beseýinde qazaqstandyq hokkeıshiler basym tústi.

2017 jyldyń 23 sáýirinde birinshi dıvızıonnyń A tobynda Ońtústik Koreıa tuńǵysh márte qazaqstandyq hokkeıshilerdi 5:2 esebimen súrindirgen edi.

Bıyl qazaqstandyq hokkeıshiler top-dıvızıonda V tobynda synǵa túsedi. Qarsylastary - Kanada, Chehııa, Shveıtsarııa, Latvııa, Slovakııa, Norvegııa, Slovenııa.

Al Ońtústik Koreıa birinshi dıvızıonda A tobynda 29 sáýir-5 mamyr aralyǵynda Ulybrıtanııanyń Nottıngem qalasynda Italııa, Ulybrıtanııa, Lıtva, Polsha, Rýmynııamen top-dıvızıonǵa jalǵyz joldamany sarapqa salady.

Endi el quramasy 24 sáýirde atalǵan qarsylasymen taǵy bir márte sheberlik baıqasady.