Shaıbaly hokkeıden álem chempıonaty: Qazaqstan quramasy búgin Latvııamen kezdesedi

ASTANA. QazAqparat - Shaıbaly hokkeıden 2023 jylǵy álem chempıonatynyń elıtalyq dıvızıonynda búgin, 20 mamyrda Qazaqstan quramasy Latvııamen kezdesedi, dep habarlaıdy QazAqparat tilshisi.

Atalǵan oıyn elorda ýaqytymen 23:20-da bastalyp, Qazsport telearnasynan tikeleı efırde kórsetiledi.

Eki qurama buǵan deıin segiz márte kezdesti. Eki oıynda Qazaqstan, altaýynda Latvııa jeńiske jetti.

Latvııa quramasy álem chempıonatyna 22 márte qatysyp otyr. 1997, 2004, 2009 jyldarda jetinshi oryn aldy.

Qazaqstandyq hokkeıshiler bıylǵy álem chempıonatynda bes kezdesý ótkizdi. Buǵan deıin býllıtten Norvegııany 4:3 esebimen jeńdi.

Odan keıin Chehııadan 1:5, Shveıtsarııadan 0:5, Kanadadan 1:5 esebimen jeńilip qaldy.

Al Slovakııany býllıtten 4:3 esebimen tize búktirdi.

Bıylǵy álem birinshiliginde latvııalyq hokkeıshiler Kanadadan 0:6, Shveıtsarııadan 1:2 esebimen jeńilse, Chehııany overtaımda 4:3, Norvegııany 2:1, Slovenııany 3:2 esebimen tize búktirdi.

Sondaı-aq, atalǵan topta búgin Kanada - Shveıtsarııa, Norvegııa - Chehııa quramalary kezdesedi.

A tobynda AQSh - Danııa, Shvetsııa - Frantsııa, Avstrııa - Fınlıandııa quramalary oınaıdy.