Shaıbaly hokkeıden ÁCh: Latvııa – qola júldeger

ASTANA. QazAqparat - Shaıbaly hokkeıden 2023 jylǵy álem chempıonatynyń elıtalyq dıvızıonynda Latvııa qola júldeger atandy, dep habarlaıdy QazAqparat tilshisi.

Álem birinshiliginde 3-oryn úshin saıysta AQSh pen Latvııa quramalary kúsh synasty.

Qazirge deıin amerıkalyq hokkeıshiler 2 márte altyn, 9 kúmis, 9 qola medal aldy. Al latvııalyq qurama jarystyń atalǵan satysynda tuńǵysh márte baq synap otyr.

Búgingi kezdesý barysynda qos qurama tartysty oıyn ótkizdi. Birinshi kezeńde bir-biriniń qaqpasynan eki-ekiden shaıba soǵyp úlgerdi.

Úshinshi kezeńde quramalar bir-bir shaıbadan soqty. Negizgi kezeń 3:3 esebimen teń aıaqtalyp, oıyn overtaımǵa ulasty. Overtaımda Latvııa jeńis shaıbasyn soqty.

Osylaısha latvııalyq hokkeıshiler óz tarıhynda tuńǵysh márte álem chempıonatynyń qola júldesin ıelendi.

Endi fınalda Germanııa men Kanada quramalary kezdesedi.