Shaıbaly hokkeıden ÁCh: Latvııa alǵash ret Chehııadan basym tústi

ASTANA. QazAqparat - Shaıbaly hokkeıden 2023 jylǵy álem chempıonatynda Latvııa quramasy Chehııany jeńip ketti, dep habarlaıdy QazAqparat tilshisi.

Úshinshi oıyn kúninde tartysty básekeler ótti. Qazaqstan quramasy synǵa túsetin V tobynda eki oıynnyń nátıjesi belgili boldy.

Álemdik hokkeıde joǵary baǵalanatyn Kanada úshinshi kezdesýde Slovakııany áreń jeńdi. Negizgi kezeńde qarsylasymen 1:1 esebimen teń oınap, jeńimpaz býllıt arqyly anyqtaldy. Bul joly kanadalyqtar hokkeıshilerdiń mereıi ústem boldy. Qorytyndy esep - 2:1.

Al Latvııa quramasy óz tarıhynda alǵash ret Chehııadan basym tústi. Qazirge deıin quramalar 10 márte kezdesken. Sonyń 9-da chehııalyqtar jeńiske jetse, 1-de teń nátıje tirkeldi. Búgin latvııalyqtar overtaımda atalǵan qarsylasyn 4:3 esebimen súrindirdi.

Aıta ketsek, Chehııa byltyr álem chempıonatynda qola júldeger atanǵan edi.

Al A tobynda AQSh quramasy jeńisti jolyn jalǵastyrdy. Úshinshi kezdesýde olar Germanııany 3:2 esebimen tize búktirip, týrnır kestesinde birinshi oryndy saqtap qaldy.

Taǵy bir kezdesýde ótken jyly álem chempıony Fınlıandııa bıylǵy týrnırde ekinshi márte jeńilistiń aşy dámin tatty. Olar býllıtten Shvetsııaǵa ese jiberdi. Qorytyndy esep - 1:2.

Aıta ketsek, Qazaqstan quramasy buǵan deıin býllıtten Norvegııany 4:3 esebimen jeńse, Chehııadan 1:5 esebimen jeńilip qaldy.

Endi qazaqstandyq hokkeıshiler 16 mamyrda Shveıtsarııamen sheberlik baıqasady.