Shaıbaly hokkeıden ÁCh: Qazaqstan quramasy Norvegııaǵa jol berdi
NUR-SULTAN. QazAqparat - Shaıbaly hokkeıden 2021 jylǵy álem chempıonatynyń elıtalyq dıvızıonynda, 31 mamyrda Qazaqstan quramasy Norvegııadan basym tústi, dep habarlaıdy QazAqparat tilshisi.
Bıylǵy týrnırde buǵan deıin qazaqstandyq hokkeıshiler tórt márte jeńiske jetip, eki kezdesýde qarsylastaryna ese jiberip qoıdy. Nátıjesinde alty oıynnan keıin on upaı jınap, týrnır kestesinde úshinshi orynǵa jaıǵasty. Búgin jeńiske jetken jaǵdaıda Qazaqstan quramasy óz tarıhynda tuńǵysh ret pleı-off kezeńine joldama alatyn edi.
Buǵan deıin qazaqstandyq hokkeıshiler býllıtten Latvııany 3:2, Fınlıandııany 2;1, negizgi kezeńde Germanııany 3:2, Italııany 11:3 esebimen jeńdi.
Alǵashqy kezeńde qos qurama bir-birine jıi shabýyldady. Osyndaı sátterdiń birinde 16-mınýtta qazaqstandyq Dmıtrıı Shevchenko mergendik tanytyp, óz quramasyn alǵa shyǵardy. Budan keıin qos quramanyń esepti ózgertetin birneshe múmkindigi boldy. Alaıda onyń eshqaısysy golǵa aınalǵan joq.
Ekinshi kezeńde de quramalardyń shabýyl shebinde jıi boı kórsetkeni baıqaldy. Dese de osyndaı sátterdiń birinde 27-mınýtta norvegııalyq Tomas Valkve Olsen kózdegen nysanadan múlt ketken joq.
Oıynnyń 41-mınýtynda norvegııalyq Stefan Espelan óz quramasyna alǵa shyǵardy. Al 59-mınýtta onyń áriptesi Matıs Olımb qorytyndy esepti belgiledi.
Osylaısha qazaqstandyq qurama qarsylasyna 1:3 esebimen jol berdi. Týrnır kestesinde ázirge on upaımen úshinshi orynda tur. Erteń, 1 maýsymda toptyq kezeńdegi sońǵy oıyndar ótkiziledi. Sodan keıin pleı-off kezeńine joldama alǵan tórt qurama anyqtalady. Olardyń qatarynan Qazaqstan quramasy da tabylýy múmkin.
