Shaıbaly hokkeıden ÁCh: Qazaqstan quramasy Kanadaǵa ese jiberdi

ASTANA. QazAqparat - Shaıbaly hokkeıden 2023 jylǵy álem chempıonatynyń elıtalyq dıvızıonynda Qazaqstan quramasy Kanadaǵa ese jiberdi, dep habarlaıdy QazAqparat tilshisi.

Álemdik hokkeıde joǵary baǵalanatyn Kanada quramasy bıyl da sátti oıyn kórsetip keledi. Jankúıer kókeıinde negizinen elimizdiń hokkeı túlekterinen jasaqtalǵan Qazaqstan olarǵa qandaı deńgeıde qarsylyq kórsete alady degen saýal bolǵany anyq.

Kezdesý basynan úıeńki japyraqty eldiń ókilderi basym oınaýǵa tyrysty. Nebári 19-sekýndta kanadalyq Makkenzı Ýıgar esep ashyp ketti. Odan keıin Loýson Krýe 5, 7-mınýtta esepti ústemeleı tússe, 9-mınýtta qazaqstandyq Ádil Beketaev esep aıyrmasyn qysqartty.

Al kanadalyq Djo Veleno 19, Semmı Ble 41-mınýtta basymdyqty arttyrdy.

Osylaısha Qazaqstan qarsylasyna 1:5 esebimen ese jiberdi.

V tobynda synǵa túsip jatqan qazaqstandyq hokkeıshiler buǵan deıin býllıtten Norvegııany 4:3 esebimen jeńdi.

Odan keıin Chehııadan 1:5 , Shveıtsarııadan 0:5 esebimen jeńilip qaldy.

Endi qazaqstandyq hokkeıshiler 19 mamyrda Slovakııamen kezdesedi.

Sondaı-aq, 17 mamyrda V tobynda Latvııa Norvegııany 2:1 esebimen jeńdi.

Al A tobynda AQSh quramasy Avstrııany 4:1, Fınlıandııa Frantsııany 5:3 esebimen jeńdi.