Shaıbaly hokkeıden ÁCh: Qazaqstan quramasy Italııany 11:3 esebimen jeńdi
NUR-SULTAN. QazAqparat - Shaıbaly hokkeıden 2021 jylǵy álem chempıonatynyń elıtalyq dıvızıonynda búgin, 29 mamyrda Qazaqstan quramasy Italııadan basym tústi, dep habarlaıdy QazAqparat tilshisi.
Alǵashqy kezeńniń 2-mınýtynda Roman Starchenko Qazaqstan quramasyn alǵa shyǵarsa, 24-mınýtta ıtalıandyq Andjelo Mıchelı tarazy basyn teńestirdi. Al 32-mınýtta qazaqstandyq Egor Petýhov qaqpa toryn dál kózdedi, al Evgenıı Rymarev 35-mınýtta mergendik tanytty. Esep 3:1. Alǵashqy eki kezeńniń nátıjesimen qazaqstandyq hokkeıshiler basymdyǵyn arttyra tústi.
Sheshýshi úshinshi kezeńde quramalar bir-biriniń qaqpasyna birneshe shaıba soǵyp ketti. Oıynnyń 41-mınýtynda Nıkıta Mıhaılıs óz múmkindigin múlt jibergen joq. Degenmen arada on sekýnd ótkende ıtalıandyq Peter Hohhofler esep aıyrmasyn qysqartty. Budan keıin qazaqstandyq qurama sapynan Kertıs Valk 46, Artem Lıhotnıkov 47, 49-mınýttarda gol soqsa, ıtalıandyq Aleks Petan 50-mınýtta mergendik tanytty. Al Kırıll Panıýkov 54, Roman Starchenko 56, Vıktor Svedberg 57, Egor Shalapov 59-mınýtta qazaqstandyq quramanyń basymdyǵyn arttyra tústi. Osylaısha Qazaqstan quramasy qarsylasynan 11:3 esebimen basym tústi.
Qazaqstandyq hokkeıshileri atalǵan jeńisinen keıin týrnır kestesinde ekinshi orynǵa kóterildi.
Eske salsaq, Qazaqstan quramasy bıylǵy týrnırde buǵan deıin bes kezdesý ótkizip, úsheýinde jeńiske jetti. Aldymen býllıtten Latvııadan 2:1, Fınlıandııadan 3:2 esebimen basym tússe, odan keıin AQSh-qa 0:3 esebimen ese jiberdi. Tórtinshi kezdesýde Germanııany 3:2 esebimen tize búktirip, odan keıin Kanadaǵa 2:4 esebimen jol berdi.
Aıta ketsek, endi Qazaqstan quramasy 31 mamyrda Norvegııamen muz aıdynǵa shyǵady. Al Italııa 30 mamyrda Kanadamen, 1 maýsymda AQSh-pen sheberlik baıqasady.
