Shaıbaly hokkeıden ÁCh: Qazaqstan quramasy býllıtte Norvegııadan basym tústi

ASTANA. QazAqparat - Shaıbaly hokkeıden 2023 jylǵy álem chempıonatynyń elıtalyq dıvızıonynda búgin, 13 mamyrda Qazaqstan quramasy Norvegııamen kezdesti, dep habarlaıdy QazAqparat tilshisi.

Quramalar V tobynda synǵa túsedi. Qarsylastary - Kanada, Slovenııa, Chehııa, Shveıtsarııa, Slovakııa, Latvııa.

Kezdesý barysynda quramalar tartysty oıyn ótkizdi. Bir-biriniń qaqpasy mańynda jıi boı kórsetti.

Aldymen norvegııalyq quramadan Mıkael Haga 7, Ole ıÝlıan Holm 9-mınýtta eki shaıba soǵyp ketti. Oǵan 15-mınýtta qazaqstandyq Maksım Mýsorov bir golmen jaýap qaıyrdy.

Oıynnyń ekinshi kezeńinde 21-mınýtynda Mıkael Haga qaıtadan óz quramasyn alǵa shyǵarsa, 35-mınýtta qazaqstandyq Valerıı Orehov kózdegen nysanadan múllt ketken joq.

Al 51-mınýtta qazaqstandyq Nıkıta Mıhaılıs tarazy basyn teńestirdi.

Negizgi kezeń 3:3 esebimen teń aıaqtalyp, oıyn overtaımǵa ulasty. Overtaımda jeńimpaz anyqtalǵan joq. Býllıtten Qazaqstan quramasy jeńiske jetti.

Endi qazaqstandyq hokkeıshiler aldaǵy oıynyn 14 mamyrda Chehııaǵa qarsy ótkizedi.

Eske salsaq, budan buryn álem chempıonatyna qatysatyn Qazaqstan quramasynyń hokkeıshileri anyqtaldy.