Shaıbaly hokkeıden ÁCh: Qazaqstan quramasy búgin Kanadamen kezdesedi

ASTANA. QazAqparat - Shaıbaly hokkeıden 2023 jylǵy álem chempıonatynyń elıtalyq dıvızıonynda búgin, 17 mamyrda Qazaqstan quramasy Kanadamen kezdesedi, dep habarlaıdy QazAqparat tilshisi.

Atalǵan oıyn elorda ýaqytymen 23:20-da bastalyp, Qazsport telearnasynan tikeleı efırde kórsetiledi.

V tobynda synǵa túsip jatqan qazaqstandyq hokkeıshiler buǵan deıin býllıtten Norvegııany 4:3 esebimen jeńdi.

Odan keıin Chehııadan 1:5, Shveıtsarııadan 0:5 esebimen jeńilip qaldy.

Al Kanada bıyl Latvııany 6:0, Slovenııany 5:2 esebimen tize búktirse, Slovakııadan býllıtten 2:1 esebimen basym tústi.

Eki qurama buǵan deıin tórt márte kezdesti. Barlyq oıynda Kanada quramasynyń mereıi ústem boldy.

Álemde Kanada eli shaıbaly hokkeıdiń otany sanalady. Qazirge deıin qylqan japyraqty eldiń ókilderi 27 márte jeńis tuǵyryna kóterilgen.

Dúbirli dodada 2021 jyly chempıon atansa, 2022 jyly kúmis medal ıegeri boldy.

Atalǵan qurama hokkeıshileriniń birqatary óz eliniń birinshiligindegi klýbtarda oıyn kórsetedi. Sondaı-aq, AQSh, Germanııa, Reseı, Fınlıandııa, Shveıtsarııa, Shvetsııa klýbtarynda oınaıtyn hokkeıshiler bar.

Sondaı-aq, búgin V tobynda Latvııa - Norvegııa sheberlik baıqasady.

Al A tobynda AQSh - Avstrııa, Fınlıandııa - Frantsııa oınaıdy.

Aıta ketsek, álem chempıonaty 12 mamyrdan Latvııanyń Rıga jáne Fınlıandııanyń Tampere qalalarynda bastaldy.

Toptyq kezeń 12 jáne 23 mamyr aralyǵyna belgilengen. Fınal 28 mamyrda bolady.