Shaıbaly hokkeı: Qazaqstan men Belarýs joldastyq kezdesýi ótpeıtin boldy
NUR-SULTAN. QazAqparat - Búgin, 15 mamyrǵa belgilengen shaıbaly hokkeıden Qazaqstan jáne Belarýs quramalary arasyndaǵy joldastyq kezdesý ótkizilmeıtin boldy, dep habarlaıdy QazAqparat tilshisi.
Bul jóninde Qazaqstan shaıbaly hokkeı federatsııasy málim etti.
Qazaqstan quramasy sapynan kezekti PTR testileý barysynda delegatsııanyń bir ókilinen koronavırýsqa qarsy synama oń nátıje berdi. Ol odan keıingi synama barysynda da dál sondaı jaǵdaıdy kórsetti. Sondyqtan quramanyń atalǵan ókili on kún boıy ózin oqshaýlaýǵa kóshti. IIHF erejesi men Latvııanyń qoldanystaǵy talabyna oraı osyndaı sheshim shyǵaryldy.
Osyǵan sáıkes ulttyq quramanyń barlyq múshesi synama tapsyrdy. Al álem chempıonatyn uıymdastyrý komıteti qazaqstandyq hokkeıshilerge Belarýspen oıyn ótkizbeý jóninde talap qoıdy. Degenmen aldaǵy oıyndarǵa jattyǵý protsesin jalǵastyrýǵa múmkindik berdi.
Aıta keteıik, 16 mamyrdan bastap týrnırge qatysatyn barlyq qurama jarys talabymen oqshaýlanýǵa kóshedi. Ári qaraı jumys protsesi buryn bekitilgen kestege sáıkes jalǵasady.
Eske sala keteıik, 13 mamyrda ótken alǵashqy joldastyq kezdesýde Qazaqstan atalǵan qarsylasynan 2:0 esebimen basym tústi.
Aıta ketken jón, álem chempıonaty Lıtvada 21 mamyr jáne 6 maýsym aralyǵynda ótkiziledi. Qazaqstandyq hokkeıshiler V tobynda Kanada, Fınlıandııa, AQSh, Germanııa, Norvegııa, Italııa jáne Latvııa quramalarymen sheberlik baıqasady.
Al A tobynda Shvetsııa, Chehııa, Shveıtsarııa, Slovakııa, Danııa, Belarýs, Ulybrıtanııa jáne Reseı bar.
