Shaıbaly hokkeı: «Aqtóbe» eresekter arasyndaǵy el birinshiligine qatysady
NUR-SULTAN. QazAqparat - Bıyl shaıbaly hokkeıden eresekter arasyndaǵy Qazaqstan birinshiligine «Aqtóbe» komandasy qatysatyn boldy, dep habarlaıdy QazAqparat tilshisi.
Bul jóninde elimizdiń shaıbaly hokkeı federatsııasy málim etti. Federatsııa usynysyna Aqtóbe oblysynyń ákimi Ońdasyn Orazalın qoldaý bildirgen. Nátıjesinde 2019/2020 jylǵy kezeńde eresekterden jasaqtalǵan «Aqtóbe» komandasy el birinshiliginde baq synaıtyn boldy.
Esterińizge sala ketelik, 2018 jyldyń qyrkúıeginde jastar arasynda «Aqtóbe» komandasy quryldy. Atalmysh ujym Qazaqstan jastar hokkeı lıgasynda baq synady. Alǵashqy jyldyń ózinde 36 kezdesýdiń barlyǵynda jeńiske jetip, chempıondyq ataqqa qol jetkizdi.
Aqtóbe oblysynyń ákimi Ońdasyn Orazalın jaqynda Qazaqstan shaıbaly hokkeı federatsııasy bas dırektory Gleb Karataevpen jáne «Aqtóbe» klýby basshylyǵymen kezdesti. Onda Aqtóbe oblysynda aldaǵy ýaqytta shaıbaly hokkeıdi damytýdyń múmkindikteri tarazylandy. Nátıjesinde shaıbaly hokkeıde Qazaqstan ashyq birinshiligine qatysý jaǵdaıy saralandy.
Budan buryn Qazaqstan birinshiliginde ózbek komandasy oınaýy múmkin ekenin habarlaǵan edik.
