Shaıbaly hokkeıden Qazaqstan kýbogy qaıda ótetini belgili boldy

ASTANA. KAZINFORM - Shaıbaly hokkeıden Qazaqstan kýbogynyń ótetin merzimi men orny belgili boldy.

Bıyl atalǵan týrnırge 11 klýb qatysady. Olar ótken maýsymdaǵy reıtıng boıynsha eki topqa bólingen. 

A tobynyń oıyndary Óskemen qalasynda ótedi. Bul topta qazirge el chempıony kókshetaýlyq «Oqjetpes», «Aqtóbe», óskemendik «Torpedo», atyraýlyq «Beıbarys», petropavldyq «Qulager» jáne «Almaty» komandalary synǵa túsedi.

Al V tobynda astanalyq «Nomad», qaraǵandylyq «Saryarqa», sońǵy kýbok ıegeri ózbekstandyq «Hýmo», rýdnyılyq «Gornıak», pavlodarlyq «Ertis» sheberlik baıqasady. 

Aldyn-ala irikteý kezeńi 22-28 tamyz aralyǵynda ótkiziledi. Odan keıin jartylaı fınalda árbir toptyń jeńimpazy kelesi toptyń ekinshi oryn alǵan klýbymen kezdesedi. 

Fınaldyq oıyn 31 tamyz ben 1 qyrkúıekte Óskemen qalasynda bolady. 

Eske salsaq, 14-18 tamyz aralyǵynda Astanada shaıbaly hokkeıden QR Prezıdenti kýbogy týrnıri ótedi.