Shaıbaly hokkeıden Chehııa quramasy 2024 jylǵy álem chempıony atandy

ASTANA. KAZINFORM - Shaıbaly hokkeıden Chehııa quramasy fınalda Shveıtsarııany jeńip, 2024 jylǵy álem chempıony atandy.

Kezdesý barysynda quramalar tartysty oıyn ótkizdi. Qarsylastar alǵashqi eki kezeńde bir-biriniń qaqpasynan sańylaý taba alǵan joq.

Úshinshi kezeńde chehııalyq Davıd Pastrnıak 49-mınýtta mergendik tanytsa, Davıd Kempf 59-mınýtta jeńis shaıbasyn soqty.

Osylaısha Chehııa qarsylasyn 2:0 esebimen jeńip, álem chempıony ataǵyn jeńip aldy. Nátıjesinde mundaı tabysty óz tarıhynda jetinshi márte baǵyndyryp otyr.

Chehııalyq hokkeıshiler sońǵy ret mundaı jetistikke 2010 jyly qol jetkizgen edi.

Aıta ketsek, budan buryn álem chempıonatynda Shvetsııa quramasy qola júldeger atandy.

Bıyl Qazaqstan quramasy elıtalyq dıvızıondaǵy ornyn besinshi jyl qatarynan saqtap qaldy.

Qazaqstan quramasy toptyq kezeńde Frantsııa men Polshany 3:1 esebimen jeńse, Slovakııaǵa 2:6, Latvııaǵa 0:2, Shvetsııaǵa 1:3, Germanııaǵa 2:8, AQSh-qa 1:10 esebimen ese jibergen bolatyn.

Álem chempıonaty 1920 jyldan beri turaqty ótkizilip keledi. Sodan bergi kezeńde Kanada - 28, KSRO (Reseı) - 27, Chehoslovakııa (Chehııa) - 12, Shvetsııa - 11, Fınlıandııa - 4, AQSh - 2, Ulybrıtanııa men Slovakııa - 1 márte jeńis tuǵyryna kóterildi.