Shaıbaly hokkeıden 2027 jylǵy álem chempıonaty qaıda ótkiziledi
ASTANA. KAZINFORM - Shveıtsarııanyń Tsıýrıh qalasynda Halyqaralyq hokkeı federatsııasynyń kongresinde 2027 jylǵy elıtalyq jáne ózge dıvızıondarda álem chempıonatyn ótkizetin elder men ýaqyty belgili boldy.
Bul dúbirli dodada elimizdiń erler, áıelder, jastar jáne jasóspirimder quramalary túrli dıvızıonda baq synaıdy.
Erler arasyndaǵy elıtalyq dıvızıondaǵy álem chempıonaty 2027 jyldyń 14-30 mamyry aralyǵynda Germanııanyń Dıýsseldorf jáne Mangeım qalalarynda ótkiziledi. Bul bedeldi básekege Qazaqstan quramasy qatysady. Bıyl elıtalyq dıvızıonnan Italııa men Ulybrıtanııa quramalary túsip qaldy. Olardyń ornyn birinshi dıvızıonda alǵashqy eki orynǵa ıe bolǵan Qazaqstan men Ýkraına quramalary ıe boldy.
Aıta ketsek, 1B dıvızıonyndaǵy áıelder arasyndaǵy álem chempıonaty 2027 jyldyń sáýirinen qarasha aıyna aýystyryldy. Dúbirli doda Ońtústik Koreıanyń Sývon qalasynda jalaýyn kóteredi.
Al U18 sanaty boıynsha 2A dıvızıonyndaǵy áıelder arasyndaǵy álem chempıonaty taǵy da Túrkııanyń Ystanbul qalasynda 2027 jyldyń 25-31 mamyry aralyǵynda bolady.
Sondaı-aq 1A dıvızıony boıynsha jastar arasyndaǵy álem chempıonatynda hokkeıshiler 2026 jyldyń 6-13 jeltoqsany aralyǵynda Vengrııa astanasy - Býdapesht qalasynda oınaıdy.
Slovenııanyń Bled qalasynda 2027 jyldyń 18-24 sáýiri aralyǵynda 1A dıvızıonyndaǵy jasóspirimder arasyndaǵy álem chempıonaty bolady.
